Xitayning chet'el axbarat organlirini axbarat yighinidin cheklishi tenqidke uchridi

Muxbirimiz irade
2017-10-26
Share

Bügün, "Xelq'ara muxbirlarni qoghdash komitéti" bayanat élan qilip, xitayning xelq'aradiki axbarat wasitilirige qoyghan cheklimisini tenqid qildi.

Charshenbe küni xitay kompartiyisi merkizi komitéti rehberlik apparatining yéngidin belgilen'gen ezalirini tonushturush axbarat élan qilish yighini échilghanda, xitay da'iriliri bir qisim dangliq chet'el taratqulirining muxbirlirini yighin zaligha kirgüzmigen. Bularning ichide "Nyu-york waqti géziti", b b s xewer agéntliqi, "Maliye waqti géziti", "Iqtisadshunaslar géziti" we "Muhapizetchi" qatarliq nopuzluq axbarat organlirining muxbirliri bar iken.

"Muhapizetchi" gézitining bu heqtiki xewiridin qarighanda, mezkur axbarat yighinigha mes'ul xadim buninggha éniq bir chüshenche bermigen, emma bezi axbarat organlirining buninggha teklip qilinmighanliqini éytqan. "Xitaydiki chet'ellik muxbirlar kulubi" bu ehwalgha naraziliq bildürüp, "Xitay hökümiti yaqturmaydighan xewerlerni élan qilghan zhurnalistlarni bundaq usul arqiliq jazalash axbarat erkinlikini éghir derijide depsende qilghanliqtur, " dégen. "Muxbirlarni qoghdash komitéti" asiya ishliri bashliqi stiwén batlér bayanatta xitay hökümitini muxbirlarning xitayda erkin xizmet qilishqa tosalghu bolmasliqqa chaqirghan.

Qiziqarliqi shuki, dunyadiki nopuzluq 5 axbarat orginining muxbirliri kirgüzülmigen bu axbarat élan qilish yighinida xitay dölet re'isi söz qilip, "Biz muxbirlarni xitayning hemme yerlirige bérip, xitayni yenimu yaxshi tonushqa chaqirimiz, " dégen. Xitayda xizmet qilidighan bir chet'el axbaratining muxbiri tiwittir torigha " Men shi jinpingning bu awazini élip yénimgha séliwalimen, kéler qétim saqchilar yolumni tossa bu awazni qoyup bérimen, " dep inkas yazghan.

Xelq'aradiki kishilik hoquq organliri teripidin élan qilin'ghan doklatlardin qarighanda, xitay chet'ellik muxbirlarning erkin xizmet qilishi eng qéyin döletlerning biri iken. Chet'ellik zhurnalistlarning bolupmu Uyghur éli we tibet qatarliq jaylargha bérishi yaki u bu jaylar heqqide bir nerse yézishi küchlük tosqunluqqa uchrap kelmekte. Firansiyelik zhurnalist ursula xanim buning tipik misali.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.