Uyghur ziyaliylirigha qilin'ghan "Xitab" ta tarixi pakitlar arqiliq bölgünchilikke qarshi küresh telep qilindi

Muxbirimiz irade
2017-04-20
Share


Uyghur élide xitay hökümiti teripidin bes-beste élip bériliwatqan "Uyghur xelqige xitab qilish" herikiti dawamida Uyghur aptonom rayonluq ijtima'iy penler akadémiyisi partkomining sékrétari, mu'awin idare bashliqi ablet memetmu bir parche xitabname élan qilip, Uyghur élining "Ezeldin xitayning ayrilmas bir parchisi" ikenlikini tekitligen.

Tengritagh torida peyshenbe küni élan qilin'ghan mezkur xitabnamide u, Uyghur ziyaliyliri Uyghur élining az sanliq milletler medeniyiti we hazirqi zaman medeniyiti tetqiqatini kücheytish, milletler tarixi we din qatarliq zor tarixiy we emeliy mesililerni tetqiq qilish arqiliq "Üch xil küchler" ning bölgünchilik idiyilirige zerbe bérishimiz kérek, dep körsetken.

Uyghur élining partkom sékrétari chén chüen'gomu 22-mart échilghan arxé'ologiye xizmet yighinida söz qilip, arxé'ologiye xizmitining "Bölgünchilik" ke qarshi küreshni nishan qilishi kéreklikini bildürüsh bilen birge, "Medeniy yadikarliqlarni bölgünchilik idiyisige qarshi küresh üchün xizmet qildurulushi" ni telep qilghan idi.

Ablet memetning "Xitabi" Uyghur aptonom rayonluq ijtima'iy penler akadémiyisining sabiq mu'awin bashliqi abdurazaq sayim "Partiye intizamigha xilapliq qilish" bilen wezipisidin qaldurulup, teptish organlirigha tapshurup bérilgen mezgilge toghra keldi.

Xitay da'iriliri abdurazaq sayimning délosida "Parixorluq we chiriklik" dégen qéliplashqan sözlerni qollan'ghan bolsimu, emma uning bir qanche Uyghur ziyaliysi bilen birla waqitta tutqun qilinishi we shuningdek del "Ikkiyüzlimchi" kadirlargha zerbe bérish tekitliniwatqan shara'itta tutqun qilin'ghan bolushi guman qozghighan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet