Xitayning tashqorghan nahiyesige ayrodrom sélish pilani diqqet qozghidi

Muxbirimiz erkin
2019.10.14

Xitay hökümiti Uyghur ilining tajikistan, afghanistan we pakistan'gha chégridash muhim istratégiyelik orun'gha jaylashqan tashqorghan nahiyesige ayrodrom sélishni qarar qilghan. Xitayning pamir égizlikidiki tajiklar merkezlik olturaqlashqan bu yiraq nahiyege ayrodrom sélish pilanining meqsiti közetküchilerning alahide diqqitini qozghimaqta.

Téxi yéqindila xitayning tajikistanning tashqorghan'gha chégridash “Hilal ay rayoni” diki gorni-bedexshan oblastida herbiy baza qurghanliqi, mezkur bazining Uyghur rayoni-tajikistan chégrasigha 30 kilométir, tajik-afghan chégrasigha 14 kilométir kélidighanliqi ashkarilan'ghan. Mana emdi uning mezkur bazigha bir qanche on kilométir kélidighan jaygha ayrodromi sélishni qarar qilghanliqi melum boldi.

“Tengritagh” torining xewer qilishiche, xitay döletlik islahat we tereqqiyat komitéti 12‏-öktebir küni özining torida mezkur organning “Shinjangdiki tashqorghanda ayrodrom yasash qurulushining mumkinchiliki heqqidiki doklat” ni testiqlighanliqi, 1 milyard 630 milyon yüen meblegh sélip, tashqorghan'gha ayrodrom sélishqa qoshulghanliqini bildürgen.

Xewerde tashqorghan ayrodromining qurulushi qeshqer wilayitining omumiy qatnash-transport sistémisigha paydiliq ikenliki, bu shu jayning qatnash shara'itini yaxshilap, qutquzush ishlirigha kapaletlik qilidighanliqi, rayonlar arisidiki ijtima'iy‏-iqtisadi tereqqiyatning qedimini maslashturidighanliqi ilgiri sürülgen. Xitay hökümiti buning aldida tashqorghan nahiyesidiki nurghun namrat tajik, Uyghur déhqan-charwichilarni “Qutquzush” namida qeshqerning ichki qismidiki jaylargha yötkigen idi.

Xitay taratqulirining xewiride qeyt qilinishiche, ayrodromning asasliq qurulushi 45 métir kengliktiki, 3800 métir uzunluqtiki bir uchush yoli, 3000 kwadrat métirliq bir yoluchilar zali, bir munar we 800 kwadrat métirliq bir awi'atsiye binasi qatarliq eslihelerni öz ichige alidiken. Analizchilarning perez qilishiche, da'iriler mezkur ayrodromni waqti kelse herbiy ishlarda ishlitish meqsitide qurmaqta iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.