Xitaydiki ayropilan qazasida 5 adem öldi

Muxbirimiz jüme
2016.07.20

20-Iyul shangxeyde bir kichik tiptiki ayropilan tunji sinaq uchushida chüshüp kétip 5 ademning jénigha zamin bolghan. “Sumurgh” torida xewer qilishiche, eyni chaghda ayropilanda ikki ayropilan xadimi we 8 bahalighuchi bar iken.

Ayropilan “Bext hawa qatnishi” dep atilidighan bir shirketke tewe bolup, ayropilan shangxeyning jinshen rayonidin jéjyangning jushen ariligha qarap uchush sepiride qazagha uchrighan. Weqede 5 adem ölgen bolsa, qalghan besh adem herxil derijide yarilan'ghan.

Nöwette qalghan 5 kishi qutquzush astigha élin'ghan bolup, bularning bir nepirining ehwali bir qeder éghir iken.

Melum bolushiche, shu künlük pa'aliyetke mezkur shirketke tewe ayropilanlardin bir nechchisi qatnashturulghan bolup, birinchi ayropilan shu jay waqti chüshtin kéyin 12 din 20 minut ötkende kötürülgen. Birinchi ayropilan'gha egishipla uchqan ikkinchi ayropilan uzaq ötmey shangxey xuxang yolidiki 7835 nomurluq köwrükke soqulup chüshüp ketken. Kéyin qutquzghuchilar kélip ayropilanni sudin süzüwalghan.

Xewerlerge qarighanda, “Bext hawa qatnishi shirkiti” xitaydiki eng chong déngiz sayahetchiliki bilen shughullinidighan shirket iken. Shirket bu qétimqi pa'aliyet arqiliq déngiz sayahetchilikni teshwiq qilishni pilan qilghan bolup, emma bularning bu pa'aliyiti qaza bilen ayaghlashqan.

Nöwette jinshen rayonluq hökümet qaza sewebini tekshürüwatqanliqini bildürgen.

Melum bolushiche, yéqinqi yillardin buyan xitayda yoluchilar ayropilani hadisiliri köp körülmigen bolsimu, emma bashqa türdiki ejellik qatnash weqeliri toxtimay yüz bérip turghan.

“Xitay kündilik xewerler géziti” ning bu yil maydiki xewirige qarighanda, dunya sehiye teshkilati xitayda her yili texminen 260 ming ademning qatnash hadisiliride ölüp kétidighanliqini bildürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.