Béyjingda ötküzülgen "Az-sanliq milletler sen'et kichiliki" pütünley siyasiy teshiwiqat tüsi bilen sehnige élip chiqilghan

Muxbirimiz nur'iman
2021-09-02
Share

Shinxu'a agéntliqining 31-awghust bergen xewirige qarighanda, "6-Nöwetlik memliketlik az sanliq milletler sen'et kichiliki" xitay paytexti béyjingda ötküzülgen. Mezkur kéchilikke xitay dölet re'isi shi jinping we xitay kompartiyesining bashqa yuqiri derijilik emeldarliri qatnashqan. Mezkur sen'et kéchilikining ötken hepte xébéy ölkisining chéngdé shehiride échilghan "Milletler xizmiti yighini" din kéyinla orunlashturulushi, shundaqla bu yighinda xitay kompartiyesining bash sékritari shi jinpingning xitaydiki milletler mesilisi boyiche "Yéngi körsetme" bérishidin kéyin ötküzülishi diqqet qozghimaqta.

Xewerde körsitilishiche, bu kéchilikke Uyghur aptonum rayonidin Uyghur, qazaq, tajik qatarliq milletlerning bir qanchilighan sen'et nomurliri qatnashturulghan. Bu nomurlarning hemmisi dégüdek siyasiy teshwiqat tüsi intayin qoyuq teshwiqat nomurliri bolup, asasliqi shi jinpinggha we xitay kompartiyesige medhiye oqulghan iken.

"Tengritagh" torning xewirige qarighanda, Uyghur aptonum rayonidin qatnashturulghan sen'et nomurlirida "Milletler ittipaqliqi", "Shinjangdiki milletlerning xoshal-xoram we bextlik yashawatqanliqi", shundaqla atalmish "Jongxu'a medeniyiti" ge bolghan telpünüsh teshwiq qilin'ghan iken.

Xewerde "Shinjang naxsha-ussul ömiki" ning ömek bashliqi turghun iminning sözliridin neqil keltürülüp, "Shinjang naxsha-ussul ömiki" ning bu kéchiliktin bir ay burun béyjinggha bérip meshiq qilghanliqi ilgiri sürülgen. Meshq jeryanida béyjingdiki merkiziy milletler naxsha-ussul ömiki ularning nomurlirini qayta-qayta tüzetken iken.

Nöwette xitay da'irilirining Uyghurlarni öz ichige alghan xitaydiki barliq az sanliq milletlerning milliy sen'itini jiddiy rewishte siyasiylashturush we xitaylashturushqa uruniwatqanliqi, shundaqla ularni atalmish "Jungxu'a medeniyiti" gewdisege yughuriwértishni pilanlawatqanliqi melum. Halbuki, Uyghur milliy sen'iti sahesidiki köp qirliq sen'etkarlardin qéyum muhemmed, moda éqim naxsha cholpini ablajan awut qatarliq qanchilighan serxilarning tutqunda ikenliki radiyomiz teripidin dellilen'gen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet