Xitay hökümiti mishél bachilét bilen uchrashqan “Wekil” lerning bezilirige xet yazdurghan

Muxbirimiz jewlan
2022.07.27
Share on WhatsApp
Share on WhatsApp

B d t kishilik hoquq aliy komissari mishél bachilét Uyghur rayonini ziyaret qilghanda, xitay hökümiti atalmish “Wekillik kishiler” ni uning bilen uchrashturghanidi؛ bügünki künde ulardin bezilirini heriketke keltürüp, mishél bachilétqa élxet yazdurghan.

7-Ayning 27-küni xitayche “Tengritagh” torida bérilgen xewerde mundaq déyilgen: “Yéqinqi mezgildin buyan, shinjangdiki köpligen kishiler b d t kishilik hoquq aliy komissari mishél bachilétqa élxet yollap, özlirining kechmishlirini bayan qildi, shinjangning heqiqiy ehwalini tonushturdi hemde amérika bashchiliqidiki gherb küchlirining shinjanggha qara sürkeshlirige bolghan küchlük naraziliqini ipadilidi”.

Xewerde éytilishiche, xet yazghanlar ichide “Térrorchilarning ziyankeshlikige uchrighanlar, kespiy terbiyelesh merkizide oqughanlar, diniy zatlar, ilmiy xadimlar, qol hünerwenchiler, zawutta ishleydighanlarning wekilliri” bar iken. Qeshqer héytgah jamesining imami memet jüme dadisi jüme damollining qandaq ziyankeshlikige uchrighanliqini bayan qilghan bolsa, kespiy terbiyelesh merkizide oqughan zeynur nametqari özining bu yerde jinsiy xorluqqa uchrimighanliqini éytqan. Shinjang islam jem'iyitining re'isi abdureqip tömür niyaz musulmanlarning bu yerde erkin yashaydighanliqini bayan qilghan bolsa, shinjang uniwérsitétining proféssori, mu'awén mektep mudiri zulhayat isma'il az sanliq milletler medeniyitining qoghdiliwatqanliqini éytqan.

B d t kishilik hoquq aliy komissari mishél bachilét 5-ayning axirida Uyghur rayonida kishilik hoquq ehwalini tekshürimen dep bérip, shi jinpingning kishilik hoquq telimatini anglap yénip kelgenidi. U bu yil 8-ayning axirida wezipisidin istépa bérishtin awwal, Uyghur rayoni heqqidiki kishilik hoquq doklatini élan qilidighanliqini bildürgen bolsimu téxiche élan qilmaywatqan bolup, xitayning buninggha bar küchi bilen tosqunluq qiliwatqanliqi melum bolghanidi. Xitay hökümitining bu atalmish “Wekiller” ge xet yazdurushimu, shu meqsetni körsitip bergen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.