Uyghur balilirining yoqap kétishi xelq'araning diqqitini qozghimaqta

Muxbirimiz sada
2018-09-21
Élxet
Pikir
Share
Print

Birleshme agéntliqning bügün, yeni 21-séntebir élan qilghan maqaliside Uyghur diyaridiki bir milyondin artuq kishining atalmish "Qayta terbiye" namidiki lagérlirigha qamilishi bilen ularning perzentlirining hökümet bashqurushidiki daril'étamlargha élip kétilgenliki ilgiri sürülgen.

Maqalide déyilishiche, bu xil daril'étamlar béyjing da'irilirining balilarni özining a'ilisi we medeniyitidin ayriwétishtiki eng yéngi sistémiliq urunushlirining biri iken. Maqalida yene lagér sirtidiki ata-anilarning öz perzentlirining milliy kimlikining yoqilip kétishidin endishe qiliwatqanliqi bayan qilin'ghan.

Maqalide yene birleshme agéntliqining türkiyede turushluq muxbirlirining qurban héyt mezgilide istanbuldiki Uyghurlarning öyliride ziyarette bolghanliqi bayan qilin'ghan. Gerche bu bir xushal bolushqa tégishlik waqitlar bolsimu, xitaydin qéchip chiqqan, emma perzentliri xitayda qep qalghan kishilerning éghir qayghu ichide turuwatqanliqi tesirlik misallar arqiliq yorutup bérilgen.

Maqalide ayali we perzenti xitay teripidin ziyankeshlikke uchrighan xalmurat idrisning kechürmishi tilgha élin'ghan. U mundaq dégen: "Ayalimning apisi éghir késel bolghanliqtin, u apisining halidin xewer élish üchün yéngi tughulghan oghlimizni élip türkiyedin weten'ge qaytqan idi. Men ayalimgha nechche qétim xitaygha barmasliqini éytqan bolsammu, u "biz qanun'gha xilap héchqandaq ish qilmiduq, bizge héchqandaq xeter yetmeydu" dep qaytip ketken idi. Bir mezgildin kéyin ayalimning ürümchi ayrodromida tutulghanliqi we bir qanche kündin kéyin qoyup bérilgenlikini bildim. Shuningdin kéyin ayalim manga özining aldirashliqini, hazirche türkiyege qaytip baralmaydighanliqini éytti hem bir aydin kéyin ayalim we balamning tengla türmige tashlan'ghanliqidin xewer taptim. "

Közetküchilerning bildürüshiche, xitay hökümiti ötken mezgillerde bigunah Uyghurlarni lagérlargha solap, ulargha "Ménge yuyush" herikiti élip barghan bolsa, emdilikte kichik balilarni ata-anisidin ayrip, Uyghurlarning milliy kimliki we medeniyitini yiltizidin qurutuwétish usulini qollanmaqtiken.

Toluq bet