Хитай даирилири қазақистан пуқралиқиға өткән бир һамилидар аялниң балисини мәҗбурий алдурувәткән

Мухбиримиз әркин
2018-11-23
Елхәт
Пикир
Share
Принт

Америкиниң дөләтлик аммиви радийоси-NPR 23‏-ноябир күни уйғур районидики қазақистан пуқралиқиға өткән бир аялниң бешиға кәлгән трагедийәлик бир вәқәни хәвәр қилди.

Бу қазақ аялниң NPR ға ашкарилишичә, у өткән йили язда хитай пуқралиқидин чиқиш рәсмийитини беҗириш үчүн икки балисини елип юртиға қайтип барған. У юртиға қайтип беришиға даириләр униң паспортини тартивелип, өзини сораққа тартқан вә нәзәрбәнд қилған. Униң йолдиши қазақистанлиқ болсиму, бирақ даириләр униң «пиланлиқ туғут» қа хилаплиқ қилғанлиқини илгири сүрүп, униңдин һамилисини алдуруветишни, әгәр рәт қилса, униң инисиниң җавабкарлиққа тартилидиғанлиқини билдүргән.

NPR Ниң хәвиридә баян қилинишичә, 2015‏-йили 2 балиси билән тул қалған бу аял қазақистанлиқ бир әркәк билән тонушуп униң билән той қилған вә қазақистан пуқралиқиға өткән икән. Бирақ 37 яшлиқ бу аялниң трагедийәси өткән йили язда уйғур райониға хитай пуқралиқидин чиқиш рәсмийитини беҗириш үчүн барғанда йүз бәргән. У юртиға йетип беришиға сақчиларниң тәқиб қилишиға учрап, сорақ қилинған шундақла дохтурханиға апирип тәкшүртүлгән. Тәкшүрүш нәтиҗисидә униң һамилидар икәнлики байқалған. Даириләр униң 2 балиси барлиқини баһанә қилип, 3‏-балисини туғушиға йол қоюлмайдиғанлиқини билдүргән. У йолдишиниң қазақистан пуқраси икәнликини ейтип, алдуруветишкә қарши чиққан болсиму, бирақ даириләр өзиниң пикиридә чиң турған. Бу аялниң NPR ға билдүрүшичә, өткән йили 12‏-айниң ахирлирида сақчилар вә йәрлик даириләр униң билән инисини һөкүмәт бинасиға чақиртип, униң инисиға әгәр ачиси һамилини алдурувәтмисә, буниң ақивитигә иниси мәсул болуш һәққидики бир һөҗҗәтни имзалатқан.

Бу қазақ аял NPR ға «бу инимниң лагерға қамилидиғанлиқидин дерәк беридиғанлиқини биләттим. Мән инимни қоғдаш үчүн баламни алдуруветишкә мақул болдум,» дегән. NPR Ниң билдүрүшичә, хитай даирилири бу қазақ аял балисини алдуруветип 4 айдин кейин, униң икки балисини елип қазақистанға қайтишиға йол қойған. Лекин униң иниси йәнила лагерға елип кетилгән. Даириләр униңға чеграда мухбирларға сөзлимәслик, уйғур районида болған ишларни ашкарилимаслиқ, балисини мәҗбурий чүшүрмигәнлик һәққидики бир вәдинамигә имза қойдуруп вәдә алғандин кейин қоюп бәргән.

Пикирләр (0)
Share
Толуқ бәт