Xitay da'iriliri qazaqistan puqraliqigha ötken bir hamilidar ayalning balisini mejburiy alduruwetken

Muxbirimiz erkin
2018.11.23

Amérikining döletlik ammiwi radiyosi-NPR 23‏-noyabir küni Uyghur rayonidiki qazaqistan puqraliqigha ötken bir ayalning béshigha kelgen tragédiyelik bir weqeni xewer qildi.

Bu qazaq ayalning NPR gha ashkarilishiche, u ötken yili yazda xitay puqraliqidin chiqish resmiyitini béjirish üchün ikki balisini élip yurtigha qaytip barghan. U yurtigha qaytip bérishigha da'iriler uning pasportini tartiwélip, özini soraqqa tartqan we nezerbend qilghan. Uning yoldishi qazaqistanliq bolsimu, biraq da'iriler uning “Pilanliq tughut” qa xilapliq qilghanliqini ilgiri sürüp, uningdin hamilisini alduruwétishni, eger ret qilsa, uning inisining jawabkarliqqa tartilidighanliqini bildürgen.

NPR Ning xewiride bayan qilinishiche, 2015‏-yili 2 balisi bilen tul qalghan bu ayal qazaqistanliq bir erkek bilen tonushup uning bilen toy qilghan we qazaqistan puqraliqigha ötken iken. Biraq 37 yashliq bu ayalning tragédiyesi ötken yili yazda Uyghur rayonigha xitay puqraliqidin chiqish resmiyitini béjirish üchün barghanda yüz bergen. U yurtigha yétip bérishigha saqchilarning teqib qilishigha uchrap, soraq qilin'ghan shundaqla doxturxanigha apirip tekshürtülgen. Tekshürüsh netijiside uning hamilidar ikenliki bayqalghan. Da'iriler uning 2 balisi barliqini bahane qilip, 3‏-balisini tughushigha yol qoyulmaydighanliqini bildürgen. U yoldishining qazaqistan puqrasi ikenlikini éytip, alduruwétishke qarshi chiqqan bolsimu, biraq da'iriler özining pikiride ching turghan. Bu ayalning NPR gha bildürüshiche, ötken yili 12‏-ayning axirlirida saqchilar we yerlik da'iriler uning bilen inisini hökümet binasigha chaqirtip, uning inisigha eger achisi hamilini alduruwetmise, buning aqiwitige inisi mes'ul bolush heqqidiki bir höjjetni imzalatqan.

Bu qazaq ayal NPR gha “Bu inimning lagérgha qamilidighanliqidin dérek béridighanliqini bilettim. Men inimni qoghdash üchün balamni alduruwétishke maqul boldum,” dégen. NPR Ning bildürüshiche, xitay da'iriliri bu qazaq ayal balisini alduruwétip 4 aydin kéyin, uning ikki balisini élip qazaqistan'gha qaytishigha yol qoyghan. Lékin uning inisi yenila lagérgha élip kétilgen. Da'iriler uninggha chégrada muxbirlargha sözlimeslik, Uyghur rayonida bolghan ishlarni ashkarilimasliq, balisini mejburiy chüshürmigenlik heqqidiki bir wedinamige imza qoydurup wede alghandin kéyin qoyup bergen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.