Хитай һөкүмитиниң балучи тәрәпдарлири билән йәң содиси қиливатқанлиқи мәлум болмақта

Мухбиримиз әзиз
2018.02.20
Share on WhatsApp
Share on WhatsApp

Қәшқәрдин пакистанниң гвадар портиғичә болған үч миң километир узунлуқтики “хитай-пакистан иқтисади каридори” ға хитай һөкүмити 60 милярд америка доллири мәбләғ салған болуп, йеқинда мәзкур қурулушниң бихәтәрлики үчүн хитай һөкүмитиниң балучи тәрәпдарлири билән астиртин сөзлишиватқанлиқи мәлум болди.

“һиндистан вақти” гезитиниң 20-февралдики хәвиридә ейтилишичә, “хитай-пакистан иқтисади қурулуши” ни пакистанниң балучистан өлкисидики өктичиләр изчил “миллий мәнпәәтимизгә зиян салди” дәп әйибләп кәлмәктә икән. Һалбуки мәзкур қурулушниң асасий мәзмуни болған ташйол, төмүрйол вә кабел қурулушиниң көп қисми балучистан тәвәсидин өтидикән. Бу қурулушниң бундин кейин балучистан қораллиқлириниң һуҗумиға учримаслиқи үчүн йеқинда хитай һөкүмити балучи тәрәпдарлири билән мәхпий сөһбәтләрни орунлаштурмақта икән.

Пакистанниң “сабах” гезитиниң бүгүнки хәвиридә ейтилишичә, пакистан тәрәп бу сөһбәтниң оңушлуқ болушини бәкму арзу қилидикән, әмма пакистан тәрәп һазирчә сөһбәтниң тәпсилий әһвалидин хәвәрсиз икән. Улар бу һәқтә сөз қилип, “әгәр балучистан тинчланса, бу һәр икки тәрәпкә мәнпәәтлик болатти, йәнә келип хитай бу йәрдә пакистанға ярдәм қиливатиду” дегән.

Мәлум болушичә, пакистандики хитай әлчиханиси йеқинда б б с агентлиқи билән болған сөһбәт зияритидә “балучистан қораллиқлири бундин кейин бизгә тәһдит болмайду” дегән. Һиндистан мәтбуатлири бу һални уйғур аптоном райони рәиси шөһрәт закирниң йеқинда “чегра линийәсидики барлиқ қанунсиз һәрикәтләрни қаттиқ бастуруш лазим” дегән сөзлири билән бағлап чүшинишкә болидиғанлиқини илгири сүриду.

Балучистан тәвәсидики мойсипитлар балучиларниң мәқсәтлири һәққидики соалларға җаваб берип, “әгәр яшларға йетәрлик иқтисадий мәнпәәт йәтсә улар қоллиридики қоралларни ташлайду. Чүнки улар бундақ турмуштин җақ тойған” дегән.

Көп көрүлгән хәвәрләр
Қисқа хәвәрләр
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.