Балучистанда икки хитай өлтүрүлгәндин кейин пакистан даирилири ши җинпиңниң алдида қийин әһвалда қалған

Мухбиримиз қутлан
2017.06.12
Share on WhatsApp
Share on WhatsApp

Пакистанниң балучистан штатида икки нәпәр хитай гөрүгә тутулуп өлтүрүлгәндин кейин, пакистан билән хитайниң адәттин ташқири “шерин ай” мунасивитидә тунҗи соғуқчилиқ көрүлгән.

Хитай дөләт рәиси ши җинпиң өткән һәптә қазақистан пайтәхти астанада өткүзүлгән “шаңхәй һәмкарлиқ тәшкилати” ға әза дөләтләр башлиқлири билән учрашқан. Дәл мушу пәйттә икки нәпәр хитай пуқраси пакистанда өлтүрүлгән.

“һиндистан вақти” гезитиниң бүгүнки хәвиригә қариғанда, хитай рәиси ши җинпиң астанадики учришишта башқа дөләтләрниң рәһбәрлири билән қизғин көрүшкән болсиму, әмма пакистан президенти наваз шерипқа нәзәр-гүзириниму сәп қоймиған. Һәтта униң билән айрим көрүшмигән.

Бу һал пакистан даирилирини қаттиқ тәңликтә қойған. Пакистанниң балучистан штатлиқ һөкүмити дәрһал таратқулар арқилиқ инкас қайтуруп, 4200 нәпәр күчлүк сақчи қошуни тәшкиллигәнликини вә балучистандики хитай ишчилириниң аманлиқини капаләткә игә қилидиғанлиқини билдүргән.

Хәвәрдә көрситилишичә, 4000 нәпәр хитай ишчиси пакистан тәвәсидә хитай-пакистан иқтисадий каридорини қуруш үчүн хизмәт қилмақтикән. Униңдин башқа йәнә 1000 нәпәр хитай бу линийидә сода ишлири билән шуғулланмақтикән. 
Ройтерс агентлиқиниң илгири сүрүшичә, пакистан даирилири хитай-пакистан иқтисадий каридориниң бихәтәрликини қоғдаш үчүн пакистан контроллуқидики кәшмир райони билән балучистан даирисидә 15 миң кишилик күчлүк армийә турғузған. Пакистан йәнә бу каридорда хизмәт қиливатқан барлиқ хитай пуқралириниң шәхсий учурини топлап, уларниң бихәтәрликини капаләткә игә қилидиғанлиқини билдүргән.

Көзәткүчиләр, өз дәвридә пакистан тәсвирлигән “пакистан билән хитайниң тағдин егиз, деңиздин чоңқур достлуқи” ниң нөвәттә икки нәпәр хитайниң балучистанда өлтүрүлүши билән соғуқчилиққа учриғанлиқиға диққәт қилмақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт