Балуҗистан азадлиқ армийәси баянат елан қилип, хитайни қаттиқ агаһландурди

Мухбиримиз әркин
2019-05-22
Елхәт
Пикир
Share
Принт

Пакистанниң балуҗистан өлкисидики йәрлик балуҗиларниң қораллиқ тәшкилати‏-балуҗистан азадлиқ армийәси баянат елан қилип, әгәр хитай балуҗистанда қәшқәр-гвадар иқтисадий каридори қурулушини давамлиқ елип барса, униң ечинишлиқ ақивәткә учрайдиғанлиқини агаһландурған.

Баянатта, балуҗистан азадлиқ армийәсиниң «мәҗид бригадиси» намлиқ алаһидә қисим тәшкил қилғанлиқи, йеқинда гвардардики «мәрвайит» меһманханисиға қаритилған һуҗумни бу қисимниң елип барғанлиқини билдүргән.

11‏-Май күни йүз бәргән бу һуҗумда гвадар порт қурулушиға қатнишиватқан хитайлар нишан қилинған болуп, һуҗумда аз дегәндә 8 адәм өлгәниди. «Вемио» намлиқ торда елан қилинған баянатта мундақ дейилгән: «хитай балуҗистанға рухсәтсиз келип, бизниң дүшминимизни қоллиди. Пакистан армийәсиниң йезилиримизни вәйран қилишиға ярдәмләшти. Лекин әмди бизниң вақтимиз кәлди. . . . . . . . . Балуҗистан азадлиқ армийәси хитай-пакистан иқтисадий каридориниң балуҗилар земинида ечинишлиқ мәғлуп болғанлиқини көрситиду. Балуҗистан, сениң кеңәймичи һәрикитиңниң гөри болуп қалиду. . . . . . . . . Мәҗид бригадисиниң алаһидә қисми қурулуп, хитай әмәлдарлириға вә униң әслиһәлиригә нишанлиқ һуҗум қилиду».

Балуҗистан, хитайниң қәшқәр-гвадар иқтисадий каридориниң деңизға чиқидиған әң истратегийәлик түгүнидур. Хитай һөкүмити уйғур елиниң қәшқәр шәһири билән балуҗистанниң гвадар портини туташтуридиған бу қурулушқа 50 милярд доллар мәбләғ аҗратқан. Лекин, бу қурулуш йәрлик уйғурларниң, шуниңдәк йәнә балуҗистан хәлқиниң қаршилиқиға учриған. Балуҗистан тәшкилатлири бу қурулушта балуҗ хәлқиниң мәнпәәти қурбан қилинғанлиқи, униң байлиқи талан-тараҗ қилинип, муһити вәйранчилиққа учраватқанлиқини илгири сүрүп, һуҗум нишанини хитайниң бу райондики ишчи вә инженерлириға қаратқан иди.

Пикирләр (0)
Share
Толуқ бәт