Xitayning qaghiliq nahiyesidimu zor kölemlik kala baqmichiliq férmisi qurmaqchi bolushi diqqet qozghidi

Muxbirimiz irade
2020-10-08
Élxet
Pikir
Share
Print

Xitay xewerler torining xewirige qarighanda, xitayning xu'aling soda-sana'et guruhi qaghiliq nahiyeside zor kölemlik kala charwichiliq meydani qurushni bashlighan. Melum bolushiche bu qurulushqa 5 milyard yüen meblegh sélin'ghan bolup, u 100 ming tuyaq kala béqish kölimige ige iken.

Bu kala baqmichiliq meydani qaghiliq nahiyesining sherqiy shimalidin 20 kilométir yiraqliqtiki janggal'eski yézisigha qurulidighan bolup, 8-öktebir ul sélish murasimi ötküzülgen.

Diqqet qozghaydighini, xitaydiki taratqular téxi bir qanche kün aldida yene shu xu'aling soda-sana'et shirkitining aqsuning bay nahiyesige 4 milyard 500 milyon yüen meblegh sélip, chong kölemlik charwichiliq férmisi qurulushi bashlighanliqini xewer qilghan, buni "3-Nöwetlik 'shinjang xizmiti söhbet yighini' üchün bir tentene" dep körsetken idi.

Gerche xewerde xitaydiki dangliq karxana guruhi bolghan xu'alingning qaghiliq nahiyesige kirishi "Nahiyege tereqqiyat we xelqqe menpe'et élip kélidu", "Bu tarixiy ehmiyetke ige" dep qattiq medhiyelen'gen bolsimu, biraq chet'ellerdiki Uyghur közetküchiler bunche zor kala baqmichiliq férmilirining meqsiti we keltüridighan aqiwitidin endishilenmekte.

Chünki xewerde qaghiliqtiki kala baqmichiliq meydani ishqa kirishse, uning 10 mingdin artuq ademni, bolupmu namrat a'ililerni xizmet tépishqa yétekleydighanliqi ilgiri sürülgen bolup, közetküchiler buning yézilardiki ahalilerning mejburiy emgekchilerge aylandurulushidin dérek béridighanliqini mölcherlimekte.

Xitay taratquliri bay nahiyeside qurulghan bazidimu 10 ming ademning ishqa orunlashturulidu, dégen idi.

Toluq bet