Хитай вәкили б д т хәвпсизлик кеңишидә айдин әнвәрниң лагерлар һәққидики суалиға дуч кәлди

Мухбиримиз әркин
2020-03-06
Елхәт
Пикир
Share
Принт

Хитайниң б д т да турушлуқ даимий вәкили б д т хәвпсизлик кеңишиниң йиғинида паалийәтчиләрниң лагерлар һәққидики суалиға дуч кәлгән.

Б д т хәвпсизлик кеңишиниң аммивий тәшкилатлар билән өткүзгән йиғинида америкадики уйғур паалийәтчи айдин әнвәр хитайниң б д т дики даимий вәкили җаң җүнгә суал қоюп, өзиниң уйғур районида ғайип болған уруқ-туғқанлирини шундақла уйғурларни кәң көләмлик тутқун қилишни қандақларчә дөләт бихәтәрликигә бағлап ақлиғили болидиғанлиқини сориған.

Хитай бу йил 3‏-айдин башлап б д т хәвпсизлик кеңишиниң рәислик орнини өткүзивалған иди. Җаң җүн 2-март күни аммивий тәшкилатлар билән учришиш йиғини өткүзүп, хитайниң хизмәт пилани һәққидә музакирә елип барған. Йиғинда америкадики уйғур паалийәтчи айдин әнвәр билән кишилик һоқуқни көзитиш тәшкилатиниң вәкили лагерлар һәққидә суал сориған. Кишилик һоқуқ көзитиш тәшкилати хитайниң б д т кишилик һоқуқ али комиссариниң уйғур районида чәклимисиз тәкшүрүш елип беришиға йол қойидиған-қоймайдиғанлиқини сориған. Җаң җүн бу суалларға бәргән җавабида хитай һөкүмитиниң қелиплашқан чақириқлирини тәкитләп, уйғур районидики тутқунниң «йәр шари характерлиқ терорлуққа қарши туруш күришидә интайин муһим» икәнликини тәктилигән.

Униң илгири сүришичә, уйғур районида кишилик һоқуқниң еғир дәпсәндичиликкә учраватқанлиқи, уйғурларға қарита кәң көләмлик назарәт елип бериливатқанлиқиға даир хәвәрләр «ялған вә өсәк сөзләр» икән. Җаң җүн б д т кишилик һоқуқ али комиссари мишел бачелетниң уйғур районини зиярәт қилишқа 10 қетимдәк тәклип қилинғанлиқини билдүргән болсиму, лекин униң мәзкур районда чәклимисиз тәкшүрүш елип беришиға йол қоюлидиған яки қоюлмайдиғанлиқиға җавап бәрмигән.

Пикирләр (0)
Share
Толуқ бәт