Б д т тәкшүрүш гурупписи: "берма һәрбий әмәлдарлири ирқий қирғинчилиқ җавабкарлиқиға тартилиши керәк"

Мухбиримиз әркин
2018-08-27
Share

Б д т ниң бир кишилик һоқуқ тәкшүрүш гурупписи дүшәнбә күни берма һәрбий әмәлдарлириниң роһиңга мусулманлириға "ирқий қирғинчилиқ" елип бериш билән җазалинишини тәләп қилди.

Тәкшүрүш гурупписи роһиңга мусулманлириға қарита системилиқ қирғинчилиқ елип беришта җавабкарлиқи бар дәп қаралған 6 нәпәр берма һәрбий гениралиниң исмини тилға алған.

Тәкшүрүш гурупписи дүшәнбә күни өзиниң тунҗи тәкшүрүш доклатини б д т ға йоллап, бу чақириқни оттуриға қойди.

Бирләшмә агентлиқиниң хәвиридә тәкитлишичә, б д т хадимлири тунҗи қетим бирма һәрбий даирилириниң қилмишини қаттиқ сөзләр билән әйиблигән. Хитай бирминиң мусулманларға қарши елип барған "қирғинчилиқ һәрикәтлири"дә изчил бирма һөкүмитини қоллап кәлгән иди.

Уйғур тәшкилатлириниң илгири сүрүшичә, б д т хадимлириниң хитай һөкүмити 3 милйондәк уйғурни йиғивелиш лагерлириға вә тәрбийәләш мәркәзлиригә йиғивелип, дуняда әндишә қозғаватқан мәзгилдә бирма һәрбий әмәлдарлирини җинайи җавабкарлиққа тартишни тәләп қилишиниң әһмийити зор икән. Улар буни "хитай мәркизи һөкүмитидики алақидар әмәлдарлар вә уйғур аптоном районлуқ партком секретари чин чүәнго башчилиқидики йәрлик әмәлдарлар үчүн күчлүк бир сигнал" дәп көрсәтмәктә.

Йеқинда б д т ниң бир комитети хитайниң 3 милйондәк уйғурни йиғивелиш лагерлирида вә тәрбийәләш мәркәзлиридә тутуп турушиға чүшәнчә беришни тәләп қилған. Униң сәл алдида америкиниң диний әркинлик ишлириға мәсул бир әмәлдари ақ сарайға тәклип сунуп, америкиниң "магнитиский кишилик һоқуқ қануни" ишқа селип, чен чүәнго башчилиқидики бәзи әмәлдарларни җазалашни оттуриға қойған.

Бирләшмә агентлиқиниң хәвиридә көрситишичә, б д т ниң 3 кишилик тәкшүрүш гурупписи роһиңга мусапирлирини, сүний һәмраһ рәсимлирини вә башқа учурларни иничилик билән тәкшүрүш арқилиқ бу доклатни тәйярлиған.

Тәкшүрүш гурупписиниң башлиқи, марзуки дарусман дүшәнбә күни өткүзгән ахбарат йиғинида, "бирма һәрбийлириниң инсан һаяти, иззәт -һөрмити вә әркинликини хорлиши пүтүн бирма хәлқиниң вә хәлқара җәмийәтниң әндишисини қозғиши керәк"дегән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт