B d t tekshürüsh ömiki xitaygha kirdi

Muxbirimiz eziz
2022-04-26
Share

Birleshken döletler teshkilati (b d t) qarmiqidiki kishilik hoquq aliy kéngishining re'isi mishél bachélétning xitaydiki tekshürüsh pa'aliyiti 25-aprél küni birinchi qedemni alghan hemde ömek süpitide xitay tewesige kirgen.

En'gliyede chiqidighan “Muhapizetchi” gézitining 26-apréldiki xewiride éytilishiche, besh kishilik tekshürüsh ömiki shu küni gu'angju shehirige chüshken hemde yerlik qanun boyiche ikki heptilik karantin'gha orunlashturulghan. Xitay tashqi ishlar ministirliqining bayanatchisi wang wénbin bu heqte muxbirlarning so'allirigha jawab bérip “B d t tekshürüsh ömiki dölitimizge yétip keldi” dégen.

Melum bolushiche, bu qétimliq tekshürüsh pa'aliyiti 2018-yilidin buyan telep qiliniwatqan bolup, ularning Uyghur diyarida cheklimisiz tekshürüshte bolush telipi izchil yoqilang bahaniler bilen ret qilinip kelgenidi. B d t ning bu xildiki tekshürüsh ömiki 2005-yilidin buyan xitaygha bérip baqmighan bolghachqa bu qétimliq ziyaret herqaysi axbarat wasitilirining zor diqqitini qozghighan.

Melum bolushiche, xitay hökümiti bu qétimqi pa'aliyetning “Tekshürüsh pa'aliyiti” emes, belki “Ziyaret” bolidighanliqini alahide tekitligen. Shu sewebtin Uyghur teshkilatliri we lagér shahitliri mishél bachélétqa özlirining bu heqtiki teleplirini yollighan bolsimu, bu heqte héchqandaq jawab alalmighan. Kishilik hoquqni közitish teshkilati xitay bölümining diréktori soféy réchardson bu heqte söz qilip “Mishél bachélét bu qétimqi ziyaritide insaniyetke qarshi jinayetlerning qurbanlirini ümidsizlendürmesliki lazim” dep körsetken.

Halbuki kishilik hoquq aliy kéngishining Uyghurlar heqqide teyyarlighan hemde 2021-yili élan qilmaqchi bolghan doklatni élan qilmay bésip qoyghanliqi sewebidin her sahe kishiliri ularning bu qétimliq tekshürüsh pa'aliyitining héchqandaq netijige érishelmeydighanliqinimu perez qilmaqtiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet