Хитайниң уйғур елидики сиясити б д т кишилик һоқуқ кеңишиниң йиғинида көп дөләтләрниң тәнқидигә учриған

Мухбиримиз әркин
2021-02-23
Share

Хитайниң уйғур елидики сиясити 22-феврал б д т кишилик һоқуқ кеңишиниң 46-нөвәтлик йиғинида коп дөләтләрниң тәнқидигә учриған. Йиғинда ваң йи, хитайниң уйғурларға "ирқий қирғинчилиқ" елип барғанлиқини рәт қилип, өзлириниң "шинҗаңда террорлуққа қарши туруш" тәдбирлирини алғанлиқи, "шинҗаңниң иҗтимаий муқимлиқ вә тәрәққияттин" бәһримән болуватқанлиқи, йеқинқи 4 йил мабәйнидә һечқандақ "террорлуқ вәқәси" йүз бәрмигәнликини илгири сүргән.

Бирақ ройтерс агентлиқиниң хәвәр қилишичә, йиғинда германийә ташқи ишлар министири хәйко маас, вәзийәтниң "шинҗаңдики уйғурларға охшаш аз санлиқ милләтләрни халиғанчә тутқун қилиш яки хитайниң хоңкоңда пуқралар әркинликини бастурушиға диққәт қилишни тәләп қиливатқанлиқи" ни билдүргән. Түркийә ташқи ишлар министири мәвлут чавушоғлу, бу мәсилидә хитайниң очуқ-ашкара болушини күтидиғанлиқи, шуниңдәк уйғур вә "шинҗаңдики башқа мусулманларниң һоқуқини қоғдашқа" чақирған.

Буниң алдида әнглийә ташқи ишлар министири доминик раб "шинҗаңдики уйғурларға қарита елип берилған" "кәң көләмлик тән җазаси, мәҗбурий әмгәк, туғмас қилиш" һәрикәтлирини әйиблигән. У сөзидә "ирқий қирғинчилиқ" дегән сөзни ишләтмигән болсиму, бирақ "шинҗаңдики әһвалниң төвән чәктин һалқип кәткәнлики" ни билдүргәниди. Бирақ йиғинда ваң йи "шинҗаңниң ишикиниң һәр вақит очуқ" икәнликини, б д т кишилик һоқуқ алий комиссариниң "шинҗаңни зиярәт қилишини қарши алидиғанлиқи" ни билдүргән, лекин немә үчүн зиярәтчиләрниң халиған җайни тәкшүрүшигә йол қоймайдиғанлиқиға чүшәнчә бәрмигән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт