Б д т баш катипи: "уйғур елида чәклимисиз тәкшүрүш елип бериш үчүн хитай билән сөзлишиватимиз"

Мухбиримиз әркин
2021-03-29
Share

Б д т ниң баш катипи антони гутеррес, хитай һөкүмити билән уйғур елида чәклимисиз тәкшүрүш елип бериш тоғрилиқ "җиддий сөзлишиватқанлиқи" ни билдүргән. Бу хитайниң уйғур елидики "ирқий қирғинчилиқи" ға сүкүт қилиш билән әйиблинип кәлгән б д т баш катипиниң тунҗи қетим уйғурлар вәзийити һәққидә бундақ бир ипадидә болушидур.

Гутерресниң ейтишичә, б д т кишилик һоқуқ алий комиссари мишел бачилетниң зиярити һәққидә "һазир кишилик һоқуқ алий комиссарияти ишханиси билән хитай даирилири оттурисида сөһбәт елип берилмақта" икән.

Гутеррес: "мән уларниң тезрақ келишим һасил қилишини вә кишилик һоқуқ алий комиссариниң тосалғусиз вә чәклимисиз хитайда зиярәттә болушини үмид қилимән," дегән. Гутеррес бу сөзләрни 28-март канада ахбарат ширкити CBC ниң мухбири розимари бартонниң зияритини қобул қиғанда ейтқан. Мишел бачилет өткән айда "шинҗаңдики халиғанчә тутқун, қопал муамилә, җинсий зораванлиқ, мәҗбурий әмгәк тоғрисидики доклатларни әтраплиқ вә мустәқил тәкшүрүп баһалашниң зөрүрлики" ни билдүргән. Бирақ хитай һөкүмити униң районда тәкшүрүш елип беришиға изчил алдинқи шәрт қошуп кәлгән иди

Хитай ташқий ишлар министирлиқиниң баянатчиси җав лиҗйән 29-марттики ахбарат йиғинида бачилетниң "шинҗаңни зиярәт қилишини қарши алидиғанлиқи", әмма "зиярәтниң өз ара алақә вә һәмкарлиқни мәқсәд қилиши, аталмиш җинайәт издәш шәклидә болмаслиқи" ни тәкитлигән. Чәт әлләрдики хитай өктичи таратқулириниң ейтишичә, нөвәттә хитай һөкүмити өзиниң уйғур елида садир қилған җинайәтлирини қандақ йошурушниң койиға чүшкән. Бу һәқтики хәвәрләрдә хитай компартийәси сиясий бюросиниң даимий әзаси ваң яң вә хитай җ х министири җав кеҗиниң өткән һәптә шинҗаңға қилған зияритиниң буниң билән мунасивәтлики икәнлики илгири сүрүлгән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт