Türkiyediki Uyghurlar mishél bachélétni lagérlargha bérishqa chaqirghan

Muxbirimiz eziz
2022-05-11
Share

Birleshken döletler teshkilati (b d t) kishilik hoquq aliy kéngishining komissari mishél bachélitning Uyghur diyaridiki ziyariti herqaysi axbarat wastiliridin yer éliwatqanda, türkiyediki Uyghur muhajirliri “Mishél bachélét lagérlarni ziyaret qilsun, shundaqla bizing ghayib bolghan uruq-tughqanlirimizning dérikini qilip baqsun” dégen mezmunda telep yollighan.

“Türkiye radiyo-téléwiziyesi” ning 11-maydiki xewiride éytilishiche, 10-may küni istanbulda mushu témini chöridigen halda mexsus muxbirlarni kütüwélish yighini chaqirilghan. Yighinda Uyghur muhajirlirining wekilliri söz qilip, mishél bachélétning musteqil halda “Terbiyelesh merkizi” ni we Uyghur diyaridiki qirghinchiliq qilmishlirini tekshürüshini telep qilghan. Türkiyediki Uyghur muhajirliridin mirzexmet bu heqte muxbirlargha söz qilip: “Biz mishél bachélétni yighiwélish lagérilirni erkin halda ziyaret qilishqa, közitish kaméraliri we xitay kadir-saqchiliri bolmighan ehwalda, shu jaydiki kishiler bilen erkin söhbetliship béqishqa chaqirimiz” dégen. Medine nazimi bolsa bu toghrisida toxtilip: “Biz b d t emeldarlirining yurtimizgha bérip heqiqi ehwalni körüp béqishini soraymiz. Ular xitay hökümitining yalghan geplirige ishinip qalsa bolmaydu” dégen.

Melum bolushiche, xitay hökümiti mishél bachélétning bu qétimqi sepirining “Tekshürüsh” emes, belki “Ziyaret” bolidighanliqini jakarlighan bolup, mushu ehwalgha qarap köp qisim kishiler buning bir qétimliq sheklen ziyaret bolup qalidighanliqini texmin qilmaqta iken. Yéqinqi mezgillerde Uyghur diyaridin melum bolghan ehwallar, xitay hökümitining lagér we tutqun heqqidiki barliq uchurni qattiq qamal qilish charisini éliwatqanliqini körsetken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet