Amérika dölet mejlisi ezaliri b d t bash katipini xitaygha qarita tedbir qollinishqa chaqirghan

Muxbirimiz erkin
2021-07-01
Share

Amérika dölet mejlisining ikki neper nupuzluq ezasi 1-iyul küni b d t bash katipi antoniyo gutérisqa ochuq xet élan qilip, uni xitayning éghir kishilik hoquq densendichilikini yéqindin közitish üchün derhal tedbir qollinishqa, shundaqla bahalap chiqishqa chaqirghan.

Amérika dölet mejlisi xitay ishliri komitétining qosh re'isliridin kéngesh palata ezasi jef mérkiliy bilen awam palata ezasi jéymis mikgowérn élan qilghan ochuq xette, Uyghurlarning weziyiti alahide tilgha élin'ghan.

Ochuq xette ishenchilik doklatlar milyonlighan Uyghur we bashqa musulman az sanliq milletlerning shinjangdiki herqaysi chong tipliq jaza lagérlirida tutup turuliwatqanliqi yaki xitayning bashqa jayliridiki türme sistémilirigha yötkelgenlikini körstiwatqanliqini bildürüp: "Lagérlar torining ghayet zor kölimini közde tutqanda, xitay hökümitining deslepte lagérlarning mewjutluqini ret qilishi, kéyin lagérlarni esebiylikke qarshi turush tedbiri déyishi yaki ixtiyariy kespiy terbiyilesh dep aqlishi ishenchilik emes," déyilgen.

Ochuq xette yene bir yil awwal 50 din artuq b d t alahide mutexessisining chaqiriq élan qilip, xitayning künséri nacharlishiwatqan kishilik hoquq weziyitini hel qilish ‍üchün keskin tedbir qollinishni telep qilghanliqi neqil keltürülüp, b d t bash katipining bu telepni emeliyleshtürüsh ‍üchün néme ishlarni qilghanliqi, jiddiy tedbir qollinishqa qandaq tosalghularning barliqini doklat qilishqa chaqirghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet