Amérika we en'gliye b d t yighinida Uyghurlar mesilisi boyiche xitayni yene eyiblidi

Muxbirimiz eziz
2020.08.25

Xitay hökümitining Uyghurlar diyaridiki siyasiy basturush herikiti xelq'araning küchlük eyibleshlirige duch kéliwatqanda amérika we en'gliye hökümetliri xelq'araliq sorunlarda xitay hökümitining “Térrorluqqa qarshi turush” bahaniside Uyghurlarni milyonlap qamaqqa élishini keskin tenqidlidi.

“Amérika awazi” ning 24-awghusttiki xewiride éytilishiche, amérika qoshma shtatlirining birleshken döletler teshkilati (b d t) da turushluq bash elchisi kélliy kraft xanim shu küni échilghan b d t xewpsizlik kéngishining térrorluqqa qarshi turush témisidiki yighinida mexsus söz qilghan. U sözide bir qisim döletlerning térrorluqqa qarshi turushni bahane qilip özlirining siyasiy muddi'alirigha yétishni qestlewatqanliqini, shunga xewpsizlik kéngishining bu xil saxtiliqni qet'iy ret qilishi lazimliqini alahide tekitligen. U bu heqtiki nutqida “Hazir shinjangda lagérlargha qamalghan milyondin artuq Uyghur we bashqa musulmanlar ammisi ‛térrorluqqa qarshi turush‚ dégen saxta niqab bilen tutqun qilin'ghan kishilerdur. Bular meyli xitayning yaki xelq'ara qanunlarning héchqandaq qanuniy tertiptin ötmigen tutqun qilish hésablinidu” dégen.

Kélliy xanim nutqida xitay hökümitining yene bir yaqtin “Térrorluqqa qarshi turush” heqqidiki xelq'araliq birliksepning ezasi boluwélip, mushu bahanide öktichi pikir sahiblirini hemde söz erkinlikini qattiq teqib astigha éliwatqanliqini, shuning bilen birge diniy étiqad erkinlikini depsende qiliwatqanliqini yighin ehlige yene bir qétim eskertken.

En'gliyening b d t da turushluq mu'awin bash wekili jéymis rosko ependimu özining mushuninggha oxshap kétidighan pikrini otturigha qoyghan hemde yighin ehlige “Xitay hökümitining Uyghurlargha qiliwatqan mu'amilisini b d t mutexessisliri xelq'araliq kishilik hoquq ehdinamilirige xilap, dep qaraydu” dep eskertken. U yene xitay hökümitining bu xil chékidin ashqan dölet siyasitini tézdin toxtitishi lazimliqini, shuningdek xelq'araning musteqil tekshürüshige yol qoyushi kéreklikini alahide tekitligen.

Halbuki yighin'gha ishtirak qilghan xitay hökümitining b d t da turushluq mu'awin bash wekili géng shu'ang “Shinjangda héchqandaq kishilik hoquq depsendichiliki mewjut emes” dégen témida söz qilghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.