Kanada parlamént ezaliri: b d t ning kishilik hoquq doklati fédiratsiye hökümitini heriketke keltürüshi kérek

31-Awghust küni birleshken döletler teshkilati kishilik hoquq ishxanisi Uyghur rayoni heqqidiki kishilik hoquq doklatini élan qilip, “Uyghur we bashqa musulman xelqlerni kolléktip tutqun qilish weqesi xelq'ara jinayet, bolupmu insaniyetke qarshi jinayet shekillendürüshi mumkin” dégen yekünni chiqarghan idi. Shundin kéyin, kanada konsérwatiplar partiyesidin garnét jéniyus (Garnett Genuis), solchilar partiyesidin aléksis brunnél (Alexis Brunelle), erkinlik partiyesidin samér zuberi (Sammer Zuberi) qatarliq parlamént ezaliri küchlük inkas qayturghan.

The Hill Times Torining bu xewiride éytilishiche, yuqiriqi parlamént ezaliri b d t ning bu doklatining kanada tashqiy ishlar minsitiri milani juliygha tesir körsitip, xitayning bügünki jinayitige inkas bildürüshige türtke bolushini ümid qilidighanliqini bildürgen. Chünki xitayning Uyghurlargha ziyankeshlik qiliwatqanliqi heqqidiki bu doklat kanada hökümitining küchlük qollishigha érishse we ular bu xil zorawanliqqa qarshi tursa, köngüldikidek ish bolidiken.

Garnét jéniyus mundaq dégen: “Hökümet choqum irqiy qirghinchiliq peyda qilishi mumkin bolghan bu ispatlargha inkas qayturushi kérek. Hökümetning bu heqte bayanat élan qilishni xalimasliqi ularning bu mes'uliyetni üstige almasliqi bilen munasiwetlik. Emma ularning shundaq mes'uliyetliri bar”.

Xewerde yene kanada “Uyghur heqlirini qoghdash qurulushi” ning diréktori memet toxtining sözi neqil élin'ghan bolup, uning bildürüshiche, birleshken döletler teshkilati bayan qilghan bu jinayetning éghirliqini nezerde tutqanda, kanada hökümitining uninggha inkas qayturmighanliqi öz mes'uliyitini ada qilmighanliqi hésablinidiken. Kanada hökümiti mejburiy emgekni toxtitish üchün xitayning mallirigha choqum cheklime qoyushi kérek iken.