70 Уйғур тәшкилати һәр қайси дөләтләрни хитайниң б д т кишилик һоқуқ органлириға киришигә қарши турушқа чақирди

Мухбиримиз җәвлан
2020-10-07
Share

7-Өктәбир уйғур кишилик һоқуқ қурулушиниң тор бетидә 70 уйғур тәшкилатиниң һәр қайси дөләтләрни хитайниң б д т кишилик һоқуқ органлириға киришигә қарши турушқа чақирғанлиқи хәвәр қилинған.

Униңда ейтилишичә, дуня уйғур қурултийи, уйғур кишилик һоқуқ қурулуши вә дуняниң һәр қайси җайлиридики 18 дөләттә паалийәт қиливатқан 68 уйғур тәшкилати бирлишип, бирләшкән дөләтләр тәшкилатиға тәләп сунуп: "биз бирләшкән дөләтләр тәшкилатиға әза һәр қайси дөләтләрни хитайниң давамлиқ кишилик һоқуқ кеңишигә әза дөләт болушиға қарши турушқа чақиримиз, чүнки хитай уйғурларниң кишилик һоқуқиға давамлиқ вә системилиқ һалда зиянкәшлик қиливатиду" дегән.

Хәвәрдә билдүрүлүшичә, 10-айниң 13-күни бирләшкән дөләтләр тәшкилати кишилик һоқуқ кеңиши сайлам өткүзүп, 15 йеңи дөләтни әзалиққа киргүзидикән, уларниң вәзипә муддити 2021-йилдин башлап үч йил болидикән.

Дуня уйғур қурултийиниң рәиси долқун әйса мундақ дегән: "хитай әгәр б д т кишилик һоқуқ кеңишигә әза болуп кирсә б д т тәшәббус қилидиған ядролуқ қиммәт қаришини бузғунчилиққа учритиду. Бирәр дөләтни кишилик һоқуқ кеңишигә әза болушқа таллиғанда униң кишилик һоқуқ хатирисигә қараш керәк. Хитай кишилик һоқуқ чүшәнчисигә бузғунчилиқ қилипла қалмай, б д т ниң тәсиридин пайдилинип, өзидики қорқунчлуқ әһвалға қарши берилгән пикирләрни бастуруп кәлди".

Уйғур кишилик һоқуқ қурулушиниң мәсули өмәр қанат әпәндиму бу һәқтә тохтилип: "уйғурларға ирқий қирғинчилиқ йүргүзүватқан хитайдәк бир дөләтниң дуняниң һә қайси җайлиридики кишилик һоқуқни назарәт қилидиған бир органға сайлинишиниң арқисидики ғәлитә мәнтиқини қәтий чүшәнгили болмайду" дегән.

Көзәткүчиләрниң қаришичә, хитай йеқинқи йилларда б д т кишилик һоқуқ кеңишигә һечқандақ төһпә қошмиған, бәлки илгири бир обдан кетиватқан кишилик һоқуқни қоғдаш системисиға кәң көләмлик бузғунчилиқ қилған; б д т ниң хәлқарадики кишилик һоқуқни қоғдаш мәсулийитини етибарға алмай, дөләтниң игилик һоқуқини қоғдаш вә башқа дөләтләрниң ички ишиға арилашмаслиқни тәкитлигән. Уйғур тәшкилатлириниң б д т йиғинлириға қатнишишиға изчил тосқунлуқ қилип кәлгән. Хитай йеқинда оттуриға қойған қарар кишилик һоқуқ мәсилисигә қаритилған йәнә бир қетимлиқ бузғунчилиқ болуп, б д т кишилик һоқуқ механизминиң үнүмлүк иҗра қилинишиға тәһдит шәкилләндүргән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт