Gérmaniye tashqi ishlar ministirining b d t da Uyghur mesilisini otturigha qoyushi telep qilindi

Muxbirimiz erkin
2019-02-25
Élxet
Pikir
Share
Print

Gérmaniyediki bir kishilik hoquq teshkilati gérmaniye tashqi ishlar ministiri heyko ma'asning b d t kishilik hoquq kéngishining yighinida tibet, Uyghur mesililirini otturigha qoyushini, shuningdek xitayni bu rayonlargha erkin bérip kélishke yol qoyushqa chaqirishini telep qilghan.

B d t kishilik hoquq kéngishining 40‏-nöwetlik yighini 25‏-féwral bashlan'ghan bolup, yighinning tunji küni échilghan yuqiri derijilikler uchrishishigha ministir derijilik emeldarlar qatnashqan idi. Heyko ma'asning yighinda bu chaqiriqqa emel qilghan-qilmighanliqi melum emes. Emma yighinda türkiye bilen en'gliyening Uyghur mesilisini otturigha qoyghanliqi melum.

Roytérs agéntliqining xewer qilishiche, yighinda en'gliyening tashqi we britaniye ittipaqi ishlirigha mes'ul dölet ministiri lord exmet "Shinjangdiki Uyghur musulmanlirining jazalinishidin chongqur endishe qiliwatimiz" dégen. Türkiye tashqi ishlar ministiri mewlüt chawush'oghlu xitayni Uyghur we bashqa musulmanlarning diniy erkinliki we medeniyet kimlikige hörmet qilishqa chaqirghan.

Roytérs agéntliqining jenwediki diplomatlarning sözini neqil keltürüshiche, xitay yighinda Uyghur rayonidiki siyasitining tilgha élinmasliqi üchün qattiq pa'aliyet élip barghan.

"Gérmaniye tehdit astidiki xelqler jem'iyiti" ning bayanatida, heyko ma'asning bu pursetni ching tutushi telep qilin'ghan. Bayanatta, uning yighinda "Tibet we shinjangning kishilik hoquq weziyitini otturigha qoyushi we shuningdek xitayni bu rayonlargha erkin bérip--kélishke yol qoyushqa chaqirishi kérekliki" tekitlen'gen.

Gérmaniye hökümiti Uyghur mesiliside gérmaniyediki kishilik hoquq teshkilatliriningla emes, oxshashla gérmaniye parlaméntidiki libéral solchi partiye-yéshillar partiyesining bésimigha uchrap kelgen idi.

Toluq bet