B d t bash katipi xitay ziyaritide Uyghur mesilisini otturigha qoyghan

Muxbirimiz erkin
2019-04-30
Élxet
Pikir
Share
Print

B d t bash katipi antoni'o gutérrésning ötken hepte béyjinggha qilghan ziyaritide Uyghur mesilisini otturigha qoyghanliqi ilgiri sürüldi.

Gutérrés ötken hepte xitayda ziyarette bolup, béyjingda ötküzülgen "Bir belwagh bir yol" xelq'ara hemkarliq yighinigha qatnashqan. Bu jeryanda u xitay re'isi shi jinping we tashqi ishlar ministiri wang yi bilen körüshken idi. Roytérs agéntliqining xewer qilishiche, b d t bash katipining bayanatchisi stéfan dujarich 29‏-aprél muxbirlargha gutérrésning wang yi bilen körüshkende Uyghur mesilisini otturigha qoyghanliqini bildürgen. Roytérsning xewiride bildürülüshiche, stéfan dujarich "Bash katip xitay da'iriliri bilen alaqidar mesililerning hemmisini sözleshti. . . . Bu shinjang mesilisinimu öz ichige alidu" dégen. Uning ilgiri sürüshiche, gutérrés xitay terepke "B d t kishilik hoquq aliy komissari mishél bashélitning bu mesilidiki teshebbusini toluq qollaydighanliqi" ni yetküzgen.

B d t kishilik hoquq aliy komissari bashélit xitayning Uyghur rayonida xelq'ara tekshürüsh élip bérishqa yol qoyushini telep qilip kelgen idi. Roytérsning xewiride qeyt qilinishiche, stéfan dujarich yene b d t bash katipining bu mesilide "Yoshurun we ashkara sorunlardiki meydani birdek" ikenlikini tekitlep, uning bu meydani "Xitayning birliki we zémin pütünlükige toluq hörmet qilishni. . . . . . . . . Shuningdek térrorluqqa qarshi turush kürishi we zorawan ashqunluqning aldini élishta kishilik hoquqqa toluq emel qilish kérekliki" ni asas qilidighanliqini ilgiri sürgen.

Gutérrés xitayni ziyaret qilishning harpisida kishilik hoquq teshkilatlirining qattiq bésimigha uchrighan. Kishilik hoquqni közitish teshkilati uning hazirghiche Uyghur rayonida yüz bériwatqan kishilik hoquq krizisige süküt qilip kéliwatqanliqini qattiq tenqidlep, bu qétim uning mezkur mesilide xitayni ashkara tenqidlishini, lagérlarni taqash heqqide shi jinpinggha bésim ishlitishini telep qilghan idi. CNN Ning xewiride tekitlinishiche, stéfan dujarich "Xitay terepning inkasigha b d t bash katipi qayil boldimu?", dégen so'algha jawab bermigen.

Toluq bet