Дуня уйғур қурултийи б д т дипломатлирини хитай зиярити давамида лагерлар мәсилисини оттуриға қоюшқа чақирди

Мухбиримиз шөһрәт һошур
2018-11-21
Елхәт
Пикир
Share
Принт

Дуня уйғур қурултийи бүгүн, йәни 21‏-ноябир күни баянат елан қилип, алдимиздики күнләрдә хитайда зиярәт болидиған б д т хәвпсизлик кеңишиниң дипломатлирини уйғур аптоном райондики лагерлар мәсилисини унтумаслиққа вә уларниң хитай тәрәп билән болған сөһбитидә лагер мәсилисини оттуриға қоюшқа дәвәт қилди.

Хәвәрләрдин мәлум болушичә, 22 ‏-ноябир билән 25 ‏-ноябирға қәдәр давам қилидиған бу зиярәт давамида мәзкур дипломатлар аввал бейҗиң әтрапидики б д т тинчлиқ сақлаш қисимлири үчүн һазирланған бир һәрбий мәшиқ базисини зиярәт қилидикән. Андин қошумчә паалийәт сүпитидә шенҗин вә гуаңҗуни зиярәт қилидикән.

Дуня уйғур қурултийи бүгүн елан қилған баянатида әгәр мәзкур дипломатлар бу қетимқи зиярәт давамида уйғур районидики йиғивелиш лагерлири мәсилисини оттуриға қоймиса, буниң хитайниң уйғур райондики бастуруш һәрикәтлиригә қарита бир йешил чирағ йеқип бериш болидиғанлиқини әскәрткән.

Лагерлар мәсилиниң җиддийлики қисқичә баян қилинған мәзкур баянатта б д т хәвпсизлик кеңишиниң хәлқара қанун вә кишилик һоқуқ мәсилисидики мәҗбурийәтлири әслитип өтүлгән. Баянатта уйғур дияридики лагерлири мәсилиси хәлқарада җиддий әндишә қозғаватқан бир пәйттә хитайниң б д т дипломатлирини бейҗиң, шенҗин вә гуаңҗуларға дәвәт қилиш шундақла хитайниң б д т тинчлиқ қисимлиридики хизмәтлирини көз-көз қилиш арқилиқ уйғур райондики җиддий вәзийәтни йошурушқа яки унтулдурушқа урунуватқанлиқи ишарәт қилинған.

Баянатта дуня уйғур қурултийиниң рәиси долқун әйсаниң аниси айхан мәмәт вә диний өлима муһәммәт салиһ һаҗимларниң лагерда җан үзгәнлики, бу лагерлардин бүгүнгичә қоюветилгәнләрниң асасән йоқлуқи, лагер қурулушиниң бу йил һәссиләп кеңәйтилгәнлики қатарлиқ уйғур вәзийитидики җиддий әһваллар хатирилитип өтүлгән.

Пикирләр (0)
Share
Толуқ бәт