Dunya Uyghur qurultiyi b d t diplomatlirini xitay ziyariti dawamida lagérlar mesilisini otturigha qoyushqa chaqirdi

Muxbirimiz shöhret hoshur
2018-11-21
Élxet
Pikir
Share
Print

Dunya Uyghur qurultiyi bügün, yeni 21‏-noyabir küni bayanat élan qilip, aldimizdiki künlerde xitayda ziyaret bolidighan b d t xewpsizlik kéngishining diplomatlirini Uyghur aptonom rayondiki lagérlar mesilisini untumasliqqa we ularning xitay terep bilen bolghan söhbitide lagér mesilisini otturigha qoyushqa dewet qildi.

Xewerlerdin melum bolushiche, 22 ‏-noyabir bilen 25 ‏-noyabirgha qeder dawam qilidighan bu ziyaret dawamida mezkur diplomatlar awwal béyjing etrapidiki b d t tinchliq saqlash qisimliri üchün hazirlan'ghan bir herbiy meshiq bazisini ziyaret qilidiken. Andin qoshumche pa'aliyet süpitide shénjin we gu'angjuni ziyaret qilidiken.

Dunya Uyghur qurultiyi bügün élan qilghan bayanatida eger mezkur diplomatlar bu qétimqi ziyaret dawamida Uyghur rayonidiki yighiwélish lagérliri mesilisini otturigha qoymisa, buning xitayning Uyghur rayondiki basturush heriketlirige qarita bir yéshil chiragh yéqip bérish bolidighanliqini eskertken.

Lagérlar mesilining jiddiyliki qisqiche bayan qilin'ghan mezkur bayanatta b d t xewpsizlik kéngishining xelq'ara qanun we kishilik hoquq mesilisidiki mejburiyetliri eslitip ötülgen. Bayanatta Uyghur diyaridiki lagérliri mesilisi xelq'arada jiddiy endishe qozghawatqan bir peytte xitayning b d t diplomatlirini béyjing, shénjin we gu'angjulargha dewet qilish shundaqla xitayning b d t tinchliq qisimliridiki xizmetlirini köz-köz qilish arqiliq Uyghur rayondiki jiddiy weziyetni yoshurushqa yaki untuldurushqa urunuwatqanliqi isharet qilin'ghan.

Bayanatta dunya Uyghur qurultiyining re'isi dolqun eysaning anisi ayxan memet we diniy ölima muhemmet salih hajimlarning lagérda jan üzgenliki, bu lagérlardin bügün'giche qoyuwétilgenlerning asasen yoqluqi, lagér qurulushining bu yil hessilep kéngeytilgenliki qatarliq Uyghur weziyitidiki jiddiy ehwallar xatirilitip ötülgen.

Toluq bet