Kishilik hoquqni közitish teshkilati: b d t xitayning insaniyetke qarshi jinayetlirini qoyup bermesliki kérek

Xelq'ara kishilik hoquqni közitish teshkilati birleshken döletler teshkilatini özi élan qilghan doklatqa asasen ish körüp, xitayning Uyghur we bashqa musulmanlargha qarshi ötküzgen insaniyetke qarshi jinayetlirini bosh qoyuwetmeslikke chaqirghan.

Roytérs agéntliqining xewer qilishiche, kishilik hoquqni közitish teshkilatining ijra'iye mudiri tirana hasan(Tirana Hassan) 2-ayning 13-küni söz qilip: “Birleshken döletler teshkilati kishilik hoquq aliy komissari wolkér türk (Volker Turk) sabiq aliy komissar mishél bachélét ötken yil 8-ayda élan qilghan doklatqa köre ish qilishqa tirishiwatqandek körünidu. Biz uning öz wedisige emel qilishini we heqiqiy tedbir qollinishini ümid qilimiz” dégen.

Bu doklatta, birleshken döletler teshkilati xewpsizlik kéngishining da'imiy eza döliti bolghan xitayning Uyghurlarni xalighanche tutup qiynashtek jinayiti körsitilgen hemde atalmish “Terbiyelesh merkizi” we türmilerge solan'ghanlarni qoyup bérish telipi sunulghanidi.

Gherb döletliri bash bolup, xitayning bu jinayetliri toghruluq birleshken döletler teshkilatida munazire élip bérish layihesi sun'ghan bolsimu, kishilik hoquq kéngishide ötküzülgen bélet tashlashta bu layihe ret qilin'ghanidi.

Tirana hasan bu heqte mundaq dégen: “Bir nechche yilning aldida b d t xewpsizlik kéngishining bundaq yighin achalishini tesewwur qilghili bolmaytti. Xitaygha bélet tashlash xitayni tekshürgili we eyibligili bolmasliq cheklimisini buzup tashlidi. Shunga bu layihening ret qilinishi meghlubiyet dep qaralmasliqi kérek, bu téxi ishning bashlinishi”.