Хәлқара кишилик һоқуқни көзитиш тәшкилати б д т ни хитайға қаттиқ позитсийәдә болушқа чақирди

Мухбиримиз ирадә
2018-03-15
Елхәт
Пикир
Share
Принт

Хәлқара кишилик һоқуқни көзитиш тәшкилати чаршәнбә күни баянат елан қилип, бирләшкән дөләтләр тәшкилатини хитайниң кишилик һоқуқ мәсилисидә өз мәсулийитини ада қилишқа чақирди.

Мәзкур тәшкилат баянатида, «хитай һөкүмитиниң бесиминиң б д т ниң кишилик һоқуққа мунасивәтлик органлириғичә йетип келиши кишини чоңқур ойландуриду», дегән вә буниңға дуня уйғур қурултийи рәиси долқун әйса әпәндиниң өткән йили б д т кишилик һоқуқ кеңишиниң йиғиниға қатнаштурулмиғанлиқини мисал көрсәткән.

Доклатта :«хитай һәрқайси дөләтләр билән бирликтә кишилик һоқуқни қоғдашни тәшәббус қилишниң орниға, уларни бөлүш, уларни мәғлуп қилиш вә җимиқтурушқа урунушта болмақта» дейилгән.

Улар йәнә, б д т кишилик һоқуқ кеңишигә әза дөләтләрниң хитайниң иқтисадий күчи арқилиқ өзидин өч елишидин әнсиригәнликтин ортақ баянатларда хитайни тәнқидләштин өзлирини қачуруватқанлиқини билдүргән вә б д т ни дәрһал тәдбир елишқа чақирған.

Кишилик һоқуқни көзитиш тәшкилати баянатида: «һечқандақ бир дөләт тәкшүрүштин халий болмаслиқи керәк. Кишилик һоқуқ кеңиши хитайниң өзиниң түп вәзиписидин қечип қутулушиға йол қоймаслиқи керәк. Б д т кишилик һоқуқ мунбиридә һәрқайси дөләтләр чоқум хитайниң хитай ичи вә сиртида зорийип бериватқан кишилик һоқуқ дәпсәндичиликигә қарши хитайни ортақ әйиблиши керәк» дәп әскәрткән.

Кишилик һоқуқни көзитиш тәшкилати баянатида ши җинпиң мәзгилидә хитайда кишилик һоқуқниң еғир дәпсәндә қилинишқа учраватқанлиқини, халиғанчә тутқун қилиш, зораванлиқ қилиш, қийнаш, паалийәтчиләр, адвокатлар вә дөләткә тәһдит дәп қаралғанларни мәҗбурий ғайиб қиливетиштәк қилмишларниң зор дәриҗидә еғирлап кәткәнликини баян қилған.

Пикирләр (0)
Share
Толуқ бәт