Xelq'ara kishilik hoquqni közitish teshkilati b d t ni xitaygha qattiq pozitsiyede bolushqa chaqirdi

Muxbirimiz irade
2018.03.15

Xelq'ara kishilik hoquqni közitish teshkilati charshenbe küni bayanat élan qilip, birleshken döletler teshkilatini xitayning kishilik hoquq mesiliside öz mes'uliyitini ada qilishqa chaqirdi.

Mezkur teshkilat bayanatida, “Xitay hökümitining bésimining b d t ning kishilik hoquqqa munasiwetlik organlirighiche yétip kélishi kishini chongqur oylanduridu”, dégen we buninggha dunya Uyghur qurultiyi re'isi dolqun eysa ependining ötken yili b d t kishilik hoquq kéngishining yighinigha qatnashturulmighanliqini misal körsetken.

Doklatta :“Xitay herqaysi döletler bilen birlikte kishilik hoquqni qoghdashni teshebbus qilishning ornigha, ularni bölüsh, ularni meghlup qilish we jimiqturushqa urunushta bolmaqta” déyilgen.

Ular yene, b d t kishilik hoquq kéngishige eza döletlerning xitayning iqtisadiy küchi arqiliq özidin öch élishidin ensirigenliktin ortaq bayanatlarda xitayni tenqidleshtin özlirini qachuruwatqanliqini bildürgen we b d t ni derhal tedbir élishqa chaqirghan.

Kishilik hoquqni közitish teshkilati bayanatida: “Héchqandaq bir dölet tekshürüshtin xaliy bolmasliqi kérek. Kishilik hoquq kéngishi xitayning özining tüp wezipisidin qéchip qutulushigha yol qoymasliqi kérek. B d t kishilik hoquq munbiride herqaysi döletler choqum xitayning xitay ichi we sirtida zoriyip bériwatqan kishilik hoquq depsendichilikige qarshi xitayni ortaq eyiblishi kérek” dep eskertken.

Kishilik hoquqni közitish teshkilati bayanatida shi jinping mezgilide xitayda kishilik hoquqning éghir depsende qilinishqa uchrawatqanliqini, xalighanche tutqun qilish, zorawanliq qilish, qiynash, pa'aliyetchiler, adwokatlar we döletke tehdit dep qaralghanlarni mejburiy ghayib qiliwétishtek qilmishlarning zor derijide éghirlap ketkenlikini bayan qilghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.