B d t kishilik hoquq yighinida "Xitay xelqining wekili kim?" dégen talash-tartish yüz berdi

Muxbirimiz shöhret hoshur
2018-03-21
Élxet
Pikir
Share
Print

Melum bolushiche, tünügün b d t ning jenwede échiliwatqan 37-nöwetlik kishilik hoquq yighinida xitay hökümet wekilliri bilen xitay öktichi zat yang jyenli arisida keskin talash-tartish yüz bergen.

Yang jyenli sözining béshidila "Xitay kompartiye hakimiyiti xitaygha wekil bolalamdu?" dep so'al qoyghan. Bu so'algha shu zaman ökte qopqan xitay hökümet wekilliri yighin riyasetchisidin yang jyenlining bu yighinda sözlesh salahiyitining bar-yoqluqini sorighan. Yighin riyasetchisi yang jyenlining sözlesh salahiyiti barliqini bayan qilghan we yang jyenlini sözini dawamlashturushqa chaqirghan.

Yang jyenli sözide xitay kompartiyesi hakimiyitining yillardin béri xitayda kishilik hoquqni éghir depsende qilip kéliwatqanliqini, jümlidin kishilerning pikir bayan qilish hoquqi we diniy erkinlikini boghuwatqanliqini pakitliri bilen otturigha qoyghan. Bu chaghda xitay hökümet wekilliri yene bir ret ornidin turup, yang jyenlining yighin témisidin chetnep ketkenlikini bayan qilghan. Yighin meydanidiki xitay wekillirining mushu xil shekildiki qopalliqi we naraziliqi tüpeyli yang jyenlining sözi dexlige uchrighan we 3 qétim üzüwétilgen. Emma b d t yighin riyasetchisining adil pozitsiyesi we himayisi bilen yang jyenli nutqini toluq we tesirlik halda tamamlighan.

B d t yighinliridiki bu xil talash-tartish ilgiriki waqitlarda xitay terep bilen dunya Uyghur qurultiyining wekilliri arisidimu yüz bergen idi. 2013‏-Yilidiki 19‏-séntebirdiki b d t yighinda rabiye qadir xanim "Sherqi türkistan" dégen atalghuni tilgha alghinida xitay wekilliri "Junggoda shinjang dégen yer bar, sherqi türkistan dégen bir yer yoq," dep naraziliq bildürgen. Rabiye xanimning jawabidin osal halgha chüshken xitay diplomat yang chéngxuy muxbirlarning aldidiki awaz'alghuni yerge étish arqiliq achchiqini chiqarghan idi.

Toluq bet