Емма рейлий б д т кишилик һоқуқ алий кеңишиниң хитай билән болған ичкий мунасивитини паш қилған

Мухбиримиз ирадә
2021.08.26
Share on WhatsApp
Share on WhatsApp

Дуняниң һәрқайси җайлиридики чирикликкә қарши туруш органлириға вәкиллик қилидиған бир гуруппа, бирләшкән дөләтләр тәшкилатиниң баш катипини б д т ниң кишилик һоқуқ адвокати емма рейлини қоғдашқа чақирди.

Б д т ниң хадимлиридин емма реллий, б д т қармиқидики кишилик һоқуқ алий кеңиши (OHCHR) ниң 2013-йилидин буян б д т йиғиниға қатнишидиған уйғур вә тибәт вәкиллириниң исимликини хитай һөкүмитигә йоллап бериватқанлиқини паш қилған иди.

Юқириқи гуруппиниң илгири сүрүшичә, б д т өзиниң бу қилмишини ашкарилап қойған емма реллийни хизмәттин қоғлаш койиға чүшкән. Улар б д т баш катипиға язған хетидә мундақ дегән: “бирләшкән дөләтләр тәшкилати дуня миқясида кишилик һоқуқни қоғдиғучи болушиға қаримай, кишилик һоқуқ актиплирини қоғдиялмиғанлиқи үчүн бу мәсулийәтни үстигә елиши керәк. Биз емма рейлий ханимниң дегәнлири үстидә толуқ, ишәнчлик вә мустәқил тәкшүрүш елип берилишини тәләп қилимиз.”

“паш қилғучиларни қоғдаш хәлқара тори” намлиқ орган б д т баш катипи антонийо гутерресқа язған хетидә емма рейлиға қарши елип берилған һәр қандақ һәрикәтни дәрһал тохтитишқа чақирған.

Бу органниң иҗраийә директори анна мерс “фокис хәвәрлири” гә қилған сөзидә “бирләшкән дөләтләр тәшкилатиниң һазирқи ичкий әдлийә системиси хаталиқларни паш қилған б д т хизмәтчилирини қоғдимайватиду. Бу номус қиларлиқ бир әһвал, у чоқум өзгириши керәк,” дегән.

Емма рейлий американиң бир қисим палата әзалири билән болған сөһбәттә б д т кишилик һоқуқ кеңишиниң һәр қетимлиқ йиғинға қатнишидиғанларниң тизимликини алдин хитайға берип келиватқанлиқини ейтқан һәмдә буни “б д т ниң хитайға хушамәт қилиши” дәп көрсәткән. У бу мәсилини көп қетим б д т ниң мунасивәтлик орунлириға мәлум қилған, шундақла бу һәқтә америка һөкүмитигә бир парчә шикайәт хети язған болуп, униңда кишилик һоқуқ алий кеңишиниң хитай һөкүмити “дүшмән” дәп қарайдиған кишиләрниң б д т йиғиниға қатнишиш әһвали, вақти қатарлиқ учурларни йиғиндин бурун хитай һөкүмитигә йоллап берип кәлгәнликини ейтқан икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.