Xitay b d t kishilik hoquq komissarining Uyghur élidiki lagérlar mesilisi heqqidiki sözidin qattiq bi'aram boldi

Muxbirimiz irade
2018-09-11
Élxet
Pikir
Share
Print

B d t ning yéngi saylan'ghan kishilik hoquq aliy komissari mishél bachélit düshenbe küni b d t kishilik hoquq kéngishining yighinida söz qilip, Uyghur rayonidiki "Qayta-terbiyelesh" lagérliri mesilisining tekshürülüshi kéreklikini éytqan idi.

Buning bilen, seyshenbe küni xitay tashqi ishlar bayanatchisi géng shu'ang derhal buninggha inkas qayturup mishél xanimni xitayning igilik hoquqini hörmet qilishqa chaqirghan.

Roytérs agéntliqining xewiridin qarighanda xitay bayanatchi géng shu'ang 11-séntebir künidiki bayanatida yene kishilik hoquq kéngishi we aliy komissarni "Bir tereplimilik" bilen eyibligen.

Halbuki, yéngi kishilik hoquq komissari mishél bachélit sözide, ötken ayda irqiy ayrimichiliqqa qarshi turush komitéti teripidin otturigha qoyulghan shinjang Uyghur aptonom rayonidiki yépiq terbiye lagérlirigha a'it doklatlarning ishenchlik melumatlar asasida yekünlen'genlikini alahide eskertip, xitay hökümitidin b d t ning rayonda musteqil tekshürüsh élip bérishigha yol qoyushini telep qilghan idi.

Roytérsning öz xewiride éytishiche, xitay terepning inkasi uning bundaq bir tekshürüshke yol qoymaydighanliqi yaki buninggha b d t ning arilishishini xalimaydighanliqidin dérek béridiken.

Düshenbe küni, xelq'ara kishilik hoquqni közitish teshkilatimu yéngi deliller asasida bir muhim doklat élan qilip, xitay hökümitining Uyghurlarni "Keng kölemde xalighanche tutqun qilip, ten jazasi bériwatqanliqi, xorlawatqanliqi we kündilik turmushning barliq sahelirini qattiq kontrol qiliwatqanliqi" ni bildürgen idi. Biraq, xitay hökümiti bu doklatnimu ret qilghan.

Chet'ellerdiki közetküchiler bu heqte tiwittér toridiki inkaslirida, eger heqiqeten yuqiridiki organlar bir tereplimilik qiliwatqan bolsa, u halda xitay hökümitini xelq'ara metbu'atlarning muxbirliri we musteqil tekshürgüchilerning rayon'gha bérishidin qorqmasliqqa, ularning bérip emeliyetni körüp kélishige purset yaritip bérishke chaqirdi.

Toluq bet