Xitayning “Shinjang wekilliri” b d t da béyjingning Uyghurlarni köchürüsh we yötkep ishqa orunlashturush siyasitini aqlighan

Muxbirimiz erkin
2021-09-24
Share

Xitayning “Shinjang wekilliri” b d t kishilik hoquq kéngishining 48-nöwetlik yighinida söz qilip, xitayning talash-tartishtiki Uyghur we bashqa musulman xelqlerni bashqa jaylargha köchürüsh we yötkep ishqa orunlashturush siyasitini aqlighan.

Xitayning “Jonggo xewerliri” agéntliqining bildürüshiche, bu nöwetlik b d t kishilik hoquq kéngishining yighinida, qizilsu oblastidin tallan'ghan bir tajik ayal bilen aqsudin tallap ewetilgen bir Uyghur ishchi atalmish “Shinjangdiki az sanliq milletler wekili” süpitide “Guwahliq” bergen.

Xitayning yüz minglighan Uyghur we bashqa musulman milletlerni “Namratliqtin qutquzush” namida en'eniwi öy makanliridin köchürüp, bashqa rayonlargha yötkishi we xitay karxanilirigha mejburi ishqa orunlashturushi Uyghurlargha qaritilghan “Irqiy qirghinchiliqning bir parchisi” dep eyiblinip kelgen idi.

B d t yighinida kérman isimlik qizilsu oblastidin kele'en bir tajik ayal, ilgiri yurtining “Tebi'iy muhiti nachar, ul eslihelirining qalaq” ikenliki, hökümetning puqralarni omumiyyüzlük bashqa jaylargha köchürüsh siyasiti yolgha qoyup, “Yurtdashlirini yoruq, azade binalargha köchürgenliki” ni éytqan. Tursun isimlik aqsudin kelgen Uyghur “Ishchi” özining xizmitini tonushturup, bu xizmetke mekteptin xizmetke qobul qilish wastisi arqiliq érishkenliki, her xil parawanliq heqlirige kapaletlik qilin'ghanliqi, bixeter ishlepchiqirish we téxnika terbiyesi alghanliqi, dem élish waqti we diniy étiqadigha kapaletlik qilinip, yataq shara'iti hazirlap bérilgenlikini bildürgen.

Kérman bilen tursun, xitayning yéngi ashkarilan'ghan bu heqtiki höjjet we doklatliri uning meqsitige qarita téximu köp su'al peyda qilghan bir waqitta b d t da xitayning siyasitini aqlighan. Tyenjin uniwérsitétining yéqinda ‍ashkarilan'ghan bir doklatida, Uyghurlarni bashqa jaygha köchürüsh we yötkep ishqa orunlashturush, ularning nupusini tarqaqlashturush we köpiyishini kontrol qilishning ünümlük charisi ikenliki tekitlen'gen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet