Хитайниң б д т арқилиқ өктичи затларни чәклимәкчи болуши тәнқидкә учриди

Мухбиримиз әзиз
2017-09-05
Елхәт
Пикир
Share
Принт

«Инсан һәқлирини көзитиш тәшкилати» бүгүн «хәлқара тәшәббусниң бәдәллири» сәрләвһилик зор һәҗимлик доклат елан қилип, хитай һөкүмитиниң һәр хил йоллар арқилиқ бирләшкән дөләтләр тәшкилати (б д т) ниң инсан һәқлирини йүксәлдүрүш ролини аҗизлитишқа урунуватқанлиқини әйиблиди.

Мәзкур тәшкилатниң тор бетидә 5-сентәбир елан қилинған доклатта тәшкилатниң рәиси кеннес рос «хитай һөкүмити һәрқачан хитай һәққидики тәнқидни қопаллиқ билән җимиқтуруш мәқситидә б д т ниң инсан һәқлири хизмитигә иштирак қилип кәлмәктә» дәп алаһидә көрсәткән. Шуниң билән биргә хитай һөкүмитиниң б д т хәвпсизлик кеңишиниң әзаси туруқлуқ өз тәвәсидики пуқрави җәмийәттә б д т ниң һәқ вә һоқуқ системисиға хилап қилмишларни көпләп садир қилишта «үлгә» болуватқанлиқини тәнқидлигән.

Мәзкур доклатта хитай һөкүмитиниң б д т арқилиқ чәтәлләрдики мустәқил паалийәтчиләрни қандақ паракәндә қиливатқанлиқи һәққидә тәпсилий мәлуматлар берилгән. Хитай һөкүмитиниң бу хилдики қилмишлириниң әмәлий мисаллири қатарида уйғур сиясий паалийәтчи долқун әйса вә тибәтләрниң мәниви даһийси далай ламаниң көп қетимлап хитай һөкүмитиниң бесими түпәйлидин б д т йиғинлиридин чәкләнгәнлики баян қилинған.

Биз бу һәқтә «инсан һәқлирини көзитиш тәшкилати» ниң пикрини аңлап беқиш үчүн уларниң нюйорк шәһиридики ишханисиға бирнәччә қетим телефон қилған болсақму улар билән сөзлишишкә мувәппәқ болалмидуқ. Нөвәттә хитай һөкүмитиниң мәзкур доклаттин толиму раһәтсиз болидиғанлиқи һәққидә қияслар оттуриға чиқмақта.

Пикирләр (0)
Share
Толуқ бәт