Xitayning b d t arqiliq öktichi zatlarni cheklimekchi bolushi tenqidke uchridi

Muxbirimiz eziz
2017-09-05
Élxet
Pikir
Share
Print

"Insan heqlirini közitish teshkilati" bügün "Xelq'ara teshebbusning bedelliri" serlewhilik zor hejimlik doklat élan qilip, xitay hökümitining her xil yollar arqiliq birleshken döletler teshkilati (b d t) ning insan heqlirini yükseldürüsh rolini ajizlitishqa urunuwatqanliqini eyiblidi.

Mezkur teshkilatning tor bétide 5-séntebir élan qilin'ghan doklatta teshkilatning re'isi kénnés ros "Xitay hökümiti herqachan xitay heqqidiki tenqidni qopalliq bilen jimiqturush meqsitide b d t ning insan heqliri xizmitige ishtirak qilip kelmekte" dep alahide körsetken. Shuning bilen birge xitay hökümitining b d t xewpsizlik kéngishining ezasi turuqluq öz tewesidiki puqrawi jem'iyette b d t ning heq we hoquq sistémisigha xilap qilmishlarni köplep sadir qilishta "Ülge" boluwatqanliqini tenqidligen.

Mezkur doklatta xitay hökümitining b d t arqiliq chet'ellerdiki musteqil pa'aliyetchilerni qandaq parakende qiliwatqanliqi heqqide tepsiliy melumatlar bérilgen. Xitay hökümitining bu xildiki qilmishlirining emeliy misalliri qatarida Uyghur siyasiy pa'aliyetchi dolqun eysa we tibetlerning meniwi dahiysi dalay lamaning köp qétimlap xitay hökümitining bésimi tüpeylidin b d t yighinliridin cheklen'genliki bayan qilin'ghan.

Biz bu heqte "Insan heqlirini közitish teshkilati" ning pikrini anglap béqish üchün ularning nyuyork shehiridiki ishxanisigha birnechche qétim téléfon qilghan bolsaqmu ular bilen sözlishishke muweppeq bolalmiduq. Nöwette xitay hökümitining mezkur doklattin tolimu rahetsiz bolidighanliqi heqqide qiyaslar otturigha chiqmaqta.

Toluq bet