“NBC Sports” қанили бейҗиң қишлиқ олимпик мусабиқисигә хизмәтчилирини әвәтмәйдикән

Мухбиримиз ирадә
2022-01-20
Share

Американиң “NBC Sports” телевизийә қанили 2022-йиллиқ бейҗиң қишлиқ олимпик мусабиқисигә хизмәтчилирини әвәтмәйдиғанлиқини җакарлиған.

19-январ күни, мәзкур қанал даирилири хитай қишлиқ олимпикини нәқ мәйдандин хәвәр қилидиған “NBC Sports” қанили хизмәтчилириниң корона вируси юқуми сәвәбидин бейҗиңға бармайдиғанлиқини, әслидә пиланланған фигора чиқирип муз тейилиш, қар тейилиш қатарлиқ мусабиқиләрниң тарқитишлирида бәлгилик өзгириш болидиғанлиқини билдүргән. Уларниң бу қарари америкадики тәнтәрбийә саһәсидә һәйранлиқ қозғиған болуп, иҗтимаий таратқуларда бу қетимлиқ олимпикниң һәқиқәтән адәттин ташқири олимпик болидиғанлиқи муназирә қозғиған.

Гәрчә “NBC Sports” қанили корона вируси юқуми сәвәбидин бейҗиңға бармайдиғанлиқини билдүргән болсиму, бирақ улар узундин бери ирқий қирғинчилиқ билән шуғуллиниватқан хитай һакимийити саһибханлиқ қилидиған қишлиқ олимпикни байқут қилғучиларниң нишаниға айланған иди.

Нурғунлиған кишилик һоқуқ тәрәпдарлири “NBC” қанилини хитайниң ирқий қирғинчилиқ олимпикини хәвәр қилмаслиққа, хитай һөкүмитиниң тәшвиқат қоралиға айланмаслиққа чақирип кәлгән.

“NBC” қанилиниң бейҗиңға бармаслиқни қарар қилишида буниң тәсири бар-йоқлиқи ениқ болмисиму, әмма бу барғансери көп дөләтләр бейҗиң қишлиқ олимпикини депломатик байқут қиливатқан бир пәйттә күчлүк диққәт қозғиди.

Һазирғичә америка, әнгилийә, канада, австралийә, литва, белгийә, данийә, шиветсийә қатарлиқ дөләтләр хитай һөкүмитиниң уйғурларға қаратқан ирқий қирғинчилиқини нәзәрдә тутуп туруп, бейҗиң қишлиқ олимпикигә һөкүмәт әмәлдарлирини әвәтмәйдиғанлиқини җакарлиған.

Японийә депломатик бойқут сөзини қолланмиған болсиму, бирақ японийә һөкүмәт әмәлдарлириниң бейҗиң қишлиқ олимпик мусабиқисиниң ечилиш мурасимиға қатнашмайдиғанлиқини билдүргән иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт