Хәлқар олимпик комитети бейҗиң қишлиқ олимпики формилириниң уйғур мәҗбурий әмгикигә четишлиқ икәнликини рәт қилған

Мухбиримиз әркин
2022-01-21
Share

Хәлқара олимпик комитети 19-январ күни баянат елан қилип, хитай кийим-кечәк ширкәтлириниң бу органни бейҗиң қишлиқ олимпики үчүн тәминлигән формиларниң мәҗбурий әмгәккә четишлиқ әмәсликини илгири сүргән. Баятта ейтилишичә, “хәл‍қара олимпик комитети 2022-йиллиқ бейҗиң қишлиқ олимпики үчүн өзиниң маркилиқ мәһсулатлирини ишләйдиған тәминлигүчиләргә қарита 3-тәрәп тәкшүрүши елип барған,” икән.

Баянатта 2021-йили 9-айда башланған тәкшүрүштә, униң “мәҗбурий әмгәк яки балилар әмгикигә четишлиқ һечқандақ алақиси байқалмиғанлиқи” тәкитләнгән, бирақ буни тәкшүрүшкә қайсий 3-тәрәпниң вәзипиләндүрүлгәнлики тилға елинмиған.

Хәлқара олимпик комитетиниң сөзи кишилик һоқуқ вә әмгәк һәқлири тәшкилатлирида суал пәйда қилған. Уларниң қаришичә, нөвәттә мәҗбурий әмгәк уйғур диярида омумиййүзлүк мәвҗут һадисә болуп, районниң нөвәттики вәзийитидә 3-бир тәрәпниң райондики мәҗбурий әмгәк әһвалиға аит тәрәпсиз, мустәқил тәкшүрүш елип бериш мумкинчилики йоқ икән.

Хәлқара олимпик комитети илгири хитайниң “хеңйүәншиң” гуруһиға қарашлиқ “анта тәнтәрбийә кийимлири ширкити” билән олимпик хадимлириниң формисини тәминләш келишими имзалиған икән.

“җәнубий хитай әтигәнлик почтиси” гезиниң хәвиридә, анта ширкитиниң тәнтәрбийә формилириниң мәҗбурий әмгәктә ишләпчиқирилмиғанлиқиға капаләт бәргәнликини ейтқан болсиму, бирақ бу ширкәт илгири таратқуларға өзлириниң “шинҗаң пахтиси” ишлитип кәлгәнлики, буниңдин кейинму давамлиқ “шинҗаң пахтиси” ишлитидиғанлиқи вә буниңдин пәхирлинидиғанлиқини ейтқан иди.

Хәлқара олимпик комитети мәзкур баянатни америка дөләт мәҗлиси әзалириниң бу һәқтики мәктубиға җавабән елан қилған. Йеқинда дөләт мәҗлисиниң хитай ишлири комитети уларға хәт йезип, олимпик формилириниң мәҗбурий әмгәктә ишләпчиқирилмаслиқиға қандақ капаләтлик қилидиғанлиқини сориған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт