Xelq'ar olimpik komitéti béyjing qishliq olimpiki formilirining Uyghur mejburiy emgikige chétishliq ikenlikini ret qilghan

Xelq'ara olimpik komitéti 19-yanwar küni bayanat élan qilip, xitay kiyim-kéchek shirketlirining bu organni béyjing qishliq olimpiki üchün teminligen formilarning mejburiy emgekke chétishliq emeslikini ilgiri sürgen. Bayatta éytilishiche, “Xel‍q'ara olimpik komitéti 2022-yilliq béyjing qishliq olimpiki üchün özining markiliq mehsulatlirini ishleydighan teminligüchilerge qarita 3-terep tekshürüshi élip barghan,” iken.

Bayanatta 2021-yili 9-ayda bashlan'ghan tekshürüshte, uning “Mejburiy emgek yaki balilar emgikige chétishliq héchqandaq alaqisi bayqalmighanliqi” tekitlen'gen, biraq buni tekshürüshke qaysiy 3-terepning wezipilendürülgenliki tilgha élinmighan.

Xelq'ara olimpik komitétining sözi kishilik hoquq we emgek heqliri teshkilatlirida su'al peyda qilghan. Ularning qarishiche, nöwette mejburiy emgek Uyghur diyarida omumiyyüzlük mewjut hadise bolup, rayonning nöwettiki weziyitide 3-bir terepning rayondiki mejburiy emgek ehwaligha a'it terepsiz, musteqil tekshürüsh élip bérish mumkinchiliki yoq iken.

Xelq'ara olimpik komitéti ilgiri xitayning “Xéngyüenshing” guruhigha qarashliq “Anta tenterbiye kiyimliri shirkiti” bilen olimpik xadimlirining formisini teminlesh kélishimi imzalighan iken.

“Jenubiy xitay etigenlik pochtisi” gézining xewiride, anta shirkitining tenterbiye formilirining mejburiy emgekte ishlepchiqirilmighanliqigha kapalet bergenlikini éytqan bolsimu, biraq bu shirket ilgiri taratqulargha özlirining “Shinjang paxtisi” ishlitip kelgenliki, buningdin kéyinmu dawamliq “Shinjang paxtisi” ishlitidighanliqi we buningdin pexirlinidighanliqini éytqan idi.

Xelq'ara olimpik komitéti mezkur bayanatni amérika dölet mejlisi ezalirining bu heqtiki mektubigha jawaben élan qilghan. Yéqinda dölet mejlisining xitay ishliri komitéti ulargha xet yézip, olimpik formilirining mejburiy emgekte ishlepchiqirilmasliqigha qandaq kapaletlik qilidighanliqini sorighan idi.