Явропа парламенти әзалири явропа иттипақини бейҗиң қишлиқ олимпикини дипломатик байқут қилишқа чақирди

Мухбиримиз әркин
2022-01-24
Share

Явропа парламенти вә явропа иттипақиға әза бәзи дөләтләр парламентлириниң 67 нәпәр әзаси очуқ хәт елан қилип, явропа иттипақи вә униңға әза дөләтләрни бейҗиң қишлиқ олимпикини дипломатик байқут қилишқа чақирған.

EURACTIVE Ахбарат торида елан қилинған очуқ хәттә, явропа парламенти вә униңға әза дөләтләрниң бейҗиң қишлиқ олимпикидин бурун баянат елан қилип, хитай кишилик һоқуқ вәзийитигә болған әндишилирини ипадилиши вә мусабиқини сияси сәвийәдә байқут қилиши керәклики тәкитләнгән.

Очуқ хәттә ейтилишичә, хәлқара олимпик комитетниң қишлиқ олимпикни хитайға бериши бир хаталиқ болуп, хитай һөкүмити бундақ бир муһим паалийәткә саһипханлиқ қилишқа лайиқ әмәс икән.

Очуқ хәттә хитайниң бурунқи бәргән вәдилириригә әмәл қилмиғанлиқи әскәртилип: “2008-йили язлиқ олимпик бейҗиңда өткүзүлди. Шу йиллиқ олимпикни хитайға бериш қарари хитай һөкүмитиниң ‍ишғалийәттики тибәт, шәрқий түркистан (шинҗаң) вә җәнубий моңғулийәни өз ичигә алған хитайдики кишилик һоқуқ вә ‍иҗтимаий шараитни өзгәртиш вәдисини асас қилған. Бирақ бу вәдиләргә әмәл қилинмидқ яки һөрмәт қилинмиди. Әксинчә, бу районларниң кишилик һоқуқ вәзийити техиму яманлашти,” дейилгән.

Очуқ хәттә, болупму ши җинпиң тәхткә чиққандин кейин, хитайдики кишилик һоқуқ вәзийитиниң техиму начарлашқанлиқи, “шәрқий түркистанда бир милйон 800 миңдин 3 милйонғичә уйғур вә башқа түркий хәлқләрниң ‛қайта тәрбийәләш‚ лагерлирида халиғанчә қамилип, ғәйрий инсаний муамилә вә сиясий меңә ююшқа тутулғанлиқи” тәкитләнгән. Очуқ хәттә көрситишичә, “бу тәрәққитят шәхсниң иззәт-һөрмитини қоғдашни олимпикниң асаси тәлипи қилған ‍олимпик әхлақи ‍өлчими вә шундақла олимпик низамиға зит” икән.

Очуқ хәттә мундақ дейилгән: “явропа парламентиниң бу йил 7-айда мақуллиған қарарида ипадиләнгәндәк, биз явропа иттипақи вә униңға әза дөләтләрни хитай һөкүмити хоңкоң, шәрқий түркистан, тибәт, җәнубий моңғулийә, макав вә башқа җайлардики кишилик һоқуқ вәзийитини һәқиқий рәвиштә яхшилиғанлиқини намайән қилмиғичә, худди австралийә, канада, әнгилийә, американи өз ичигә алған бир қисим дөләтләр қилғандәк, мусабиқини дипломатик байқут қилишқа чақиримиз.”

Мәзкур очуқ хәт бейҗиң қишлиқ олимпикигә икки һәптидин аз вақит қалған, шундақла франсийә, германийәни өз ичигә алған явропа иттипақидики нурғун дөләтләр бейҗиң олимпикини байқут қилиш-қилмаслиқни ашкара елан қилмиған һалқилиқ бир пәйттә, елан қилинған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт