Хәлқара олимпик комитети муавин президенти җон котесниң "хитай кишилик һоқуқниң сиртида" дегән сөзи тәнқидкә учриди

Мухбиримиз әркин
2021-10-15
Share

Хәлқара олимпик комитетиниң муавин президенти җон котесниң 13-‍өктәбир күни мухбирларға қилған сөзи, тветтир қатарлиқ иҗтимаий алақә супилирида ғулғула қозғап, кишилик һоқуқ паалийәтчилириниң қаттиқ тәнқидигә учриған. Җон котес хитайниң келәр йили 2-айда бейҗиң қишлиқ олимпик мусабиқисигә саһибханилиқ қилиш алдида униң уйғурларға тутқан муамилисини тәнқид қилишни рәт қилғаниди. "әл-җәзирә" қанилиниң хәвиридә ейтилишичә, җон котес америка дөләт мәҗлиси әзалири вә кишилик һоқуқ тәшкилатлириниң бейҗиң қишлиқ олимпикини кечиктүрүш яки башқа дөләткә йөткәш чақириқини рәт қилған.

У, хитай "кишилик һоқуқ категорийәсиниң ичидә әмәс" дегән бешарәтни бәргән. Шу күни австралийә кишилиқ һоқуқ тәшкилатиниң директори елийен пейрсон тветтирда җон котесниң сөзигә инкас қайтуруп, "җон котес немә үчүн инсанлиққа қарши җинайәт садир қиливатқан бир һөкүмәтни тәнтәрбийә арқилиқ юмақчи болиду" дәп соал қойған. ‍Униң ейтишичә, хәлқара олимпик комитети кишилик һоқуқ истиратегийәси елан қилған болсиму, бирақ қишлиқ олимпикқа хитай саһибханилиқ қилғачқа уни тәдбиқлимайдиғандәк көрүнмәктикән.

Шу күни йәнә әнглийә нюкәсел университетиниң тәтқиқатчиси, уйғуршунас җоан симис фенлейму тветтерда инкас билдүрүп, "хитайниң һәрқандақ хәлқара қанун вә әһдинамиләргә очуқ-ашкара хилаплиқ қилишиға қаримай, шинҗаңдики вәһшийликни көрмәскә селип туруп, хәлқара олимпик комитетиниң өзини хәлқаралиқ дурус орган, дәп сүрәтлишини чүшәнмәк қийин" дәп көрсәткән. Җон котес 13-өктәбир австралийәдики бир қетимлиқ паалийәттә, "биз дуня һөкүмити әмәс. Биз мусабиқигә саһибианлиқ қилидиған дөләтниң игилик һоқуқиға һөкүмәт қилиши керәк" дегән иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт