CECC Ning re'isliri xelq'ara olimpik komitéti re'isige mejburiy emgek mehsulatliri toghrisida mektup yollidi

Muxbirimiz eziz
2022-01-12
Share

Amérika dölet mejlisi qarmiqidiki xitay ishliri ijra'iye komitéti (CECC)ning qosh re'isliridin jéf mérkéliy we jéymis mekgowérin 12-yanwar küni xelq'ara olimpik komitétining re'isi tomas bakqa mexsus mektup yollidi. Mektupta ular Uyghur diyaridiki paxta mehsulatlirini ishlitidighanliqini ashkara halda jakarlighan “Anta tenterbiyisi” we “Xéngyu'enshyang guruhi” ning xelq'ara olimpik komitéti bilen tenherketchilerning kyi'imlirini zakaz qilish toxtami tüzgenlikini chöridigen halda bu heqtiki bir qatar so'allargha jawab telep qildi.

Xitay ishliri ijra'iye komitétining tor bétide élan qilin'ghan ochuq mektupta amérika hökümitining mejburiy emgekni qet'i chekleydighanliqi, bu heqte mexsus qanunmu imzalan'ghanliqi, emma Uyghur diyaridiki paxta mehsulatlirining herqachan mejburiy emgek we sistémiliq zulum bilen baghlinishliq bolup kelgenliki tekitlinip “Xitay shirketliri ishlepchiqarmaqchi bolghan olimpik musabiqisi kiyimliri ashu xil mejburiy emgekke chétilidu. Shundaq bolghanda olimpik tenherketchiliri yaki olimpik xadimlirining mejburiy emgek bilen bulghan'ghan bu kyi'imlerni kyi'ishi qandaq ish?” déyilidu.

Mektupta alahide qilip Uyghur diyaridiki asasliq zulum shekilliridin zor kölemlik nazaret we tutqun, diniy étiqad erkinlikining éghir cheklimige uchrishi, ayallarni mejburiy tughmas qiliwétish, balilarni a'ililiridin juda qilish qatarliqlar sherhilinip “Hazir bu rayondiki mejburiy emgek qilmishi Uyghurlargha qarshi ijra qiliniwatqan qirghinchiliqning hemde insaniyetke qarshi jinayetlerning bir muhim mezmuni bolup qéliwatidu” déyilidu. Shuningdek 2022-yilining axirigha qeder olimpik komitétini tenterbiye kiyimliri bilen temin etmekchi bolghan “Anta tenterbiyisi” we “Xéngyu'enshyang guruhi” ning Uyghur diyarida zawutliri barliqini hemde ularning “Biz shinjang paxtisini ishlitimiz” dep ashkara jakarlighanliqini, emma “Aksyos tori” (Axios) ulardin paxta heqqide so'al sorighanda ularning “Biz chet'eldin import qilin'ghan paxta ishlitimiz” dégenlikini, emma bu heqtiki import höjjetlirini körsitelmigenlikini eslitip “Silerge bu kyi'imlerning paxta menbesi körsitildimu?” dep so'al qoyuldi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet