Байден һөкүмити бейҗиң олимпик мусабиқисини "дипломатик байқут" қилмақчи

Мухбиримиз әзиз
2021-11-16
Share

Хитай һөкүмитиниң уйғур дияридики зулум вә қирғинчилиқ қилмишлирини әйибләштики бир күчлүк тәләп 2022-йилидики бейҗиң қишлиқ олимпик мусабиқисини байқут қилиш болуп кәлгәниди. Йеқинда байден һөкүмитиниң бу мусабиқини "дипломатик байқут" қилиш алдида туруватқанлиқи һәққидә учурлар тарқалди.

"вашингтон почтиси" гезитиниң 16-ноябирдики хәвиридә ейтилишичә, ақсарайдики әһвалдин хәвәрдар бәзи әрбаблар "президент байден яки башқа һөкүмәт әмәлдарлириниң бейҗиң олимпик мусабиқисигә бармайдиғанлиқи пат йеқинда елан қилиниду", дегән. Мәлум болушичә, бу қарарниң елиниши хитай һөкүмитиниң уйғур дияридики вә хоңкоңдики бастуруш қилмишлириға қайтурулған инкасларниң бири сүпитидә оттуриға чиқмақчи икән.

Хәвәрдә ейтилишичә, ақсарай техи бу қарарни рәсмий елан қилмиған болсиму, әмма бу һәқтики рәсмий тәклип лайиһәси хели бурунла ақ сарайға йолланған һәмдә ноябир ейи чиқип кетиштин илгири тәстиқлинидикән. Америка авам палатасиниң рәиси нәнсий пелоси ханимму май ейидики гуваһлиқ йиғинида бу һәқтә сөз қилип: "ирқий қирғинчилиқ қиливатқан хитайдәк бир дөләткә һөрмәт көрсәткән бир дөләтниң кишилик һоқуқ һәққидә сөз қилғудәк һечқандақ салаһийити болмайду. Тәнһәрикәтчилиримизгә һөрмәтләр болсун, әмма дипломатик байқутму болсун" дегәниди.

Америка хәлқара диний әркинлик комитетиниң муавин рәиси нурий түркәл бу һәқтә мухбирларға сөз қилип; "2008-йилидики олимпик мусабиқисини хитайда өткүзүшниң савақлирини хәлқара җәмийәт унтумаслиқи лазим. Чүнки хитай һөкүмити мушу хилдики олимпик мусабиқиси арқилиқ натсистлар германийәсигә охшаш дуняниң диққитини қирғинчилиқтин буривәтмәкчи болуватиду" дегән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт