Baydén hökümiti béyjing olimpik musabiqisini "Diplomatik bayqut" qilmaqchi

Muxbirimiz eziz
2021-11-16
Share

Xitay hökümitining Uyghur diyaridiki zulum we qirghinchiliq qilmishlirini eyibleshtiki bir küchlük telep 2022-yilidiki béyjing qishliq olimpik musabiqisini bayqut qilish bolup kelgenidi. Yéqinda baydén hökümitining bu musabiqini "Diplomatik bayqut" qilish aldida turuwatqanliqi heqqide uchurlar tarqaldi.

"Washin'gton pochtisi" gézitining 16-noyabirdiki xewiride éytilishiche, aqsaraydiki ehwaldin xewerdar bezi erbablar "Prézidént baydén yaki bashqa hökümet emeldarlirining béyjing olimpik musabiqisige barmaydighanliqi pat yéqinda élan qilinidu", dégen. Melum bolushiche, bu qararning élinishi xitay hökümitining Uyghur diyaridiki we xongkongdiki basturush qilmishlirigha qayturulghan inkaslarning biri süpitide otturigha chiqmaqchi iken.

Xewerde éytilishiche, aqsaray téxi bu qararni resmiy élan qilmighan bolsimu, emma bu heqtiki resmiy teklip layihesi xéli burunla aq saraygha yollan'ghan hemde noyabir éyi chiqip kétishtin ilgiri testiqlinidiken. Amérika awam palatasining re'isi nensiy pélosi xanimmu may éyidiki guwahliq yighinida bu heqte söz qilip: "Irqiy qirghinchiliq qiliwatqan xitaydek bir döletke hörmet körsetken bir döletning kishilik hoquq heqqide söz qilghudek héchqandaq salahiyiti bolmaydu. Tenheriketchilirimizge hörmetler bolsun, emma diplomatik bayqutmu bolsun" dégenidi.

Amérika xelq'ara diniy erkinlik komitétining mu'awin re'isi nuriy türkel bu heqte muxbirlargha söz qilip؛ "2008-Yilidiki olimpik musabiqisini xitayda ötküzüshning sawaqlirini xelq'ara jem'iyet untumasliqi lazim. Chünki xitay hökümiti mushu xildiki olimpik musabiqisi arqiliq natsistlar gérmaniyesige oxshash dunyaning diqqitini qirghinchiliqtin buriwetmekchi boluwatidu" dégen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet