Америка президенти җов байден "бейҗиң қишлиқ олимпик тәнһәрикәт мусабиқисини депломатик бойқут қилишни ойлишиватимиз" дегән

Мухбиримиз ирадә
2021-11-18
Share

Америка президенти җов байден американиң 2022-йиллиқ бейҗиң қишлиқ олимпик тәнһәрикәт мусабиқисини хитайниң кишилик һоқуқ хатириси сәвәбидин дипломатик бойқут қилишни ойлишиватқанлиқини ейтқан.

У бу сөзләрни 18-ноябир пәйшәнбә күни канада баш минстири җустин трудо билән өткүзгән сөһбитидин кейинки мухбирларни күтүвелиш йиғинида қилған.

У мухбирларниң соалиға җаваб бәргәндә, келәр йили 2-айдики бейҗиң қишлиқ олимпик мусабиқисини бойқут қилиш пикрини "биз ойлишиватқан бир иш" дегән.

Адәттә олимпик мусабиқисиниң әнәниси бойичә америка вә башқа дөләтләр мусабиқигә юқири дәриҗилик әмәлдарлар өмики әвәтидиған болуп, бу йил 7-айда токйода өткүзүлгән олимпик мусабиқисигә биринчи ханим җил байден америка тәнһәрикәтчилиригә йетәкчилик қилип барған иди.

Әгәр бейҗиң қишлиқ олимпики бойқут қилинған тәқдирдә, америка униңға һечқандақ депломатини әвәтмәйдикән, әмма тәнһәрикәтчиләр берип мусабиқигә қатнишиверидикән.

"вашингтон почтиси" гезити икки күн алдида елан қилған хәвиридә, хитай һөкүмитиниң уйғурларға қаритиватқан ирқий қирғинчилиқи сәвәбидин бейҗиң қишлиқ олимпик мусабиқисини бойқут қилиш тәклипиниң ақсарайға рәсмий йосунда йолланғанлиқини вә президент байденниң мушу айниң ахириғичә бу һәқтә бир қарар чиқиридиғанлиқини билдүргән иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт