Amérika prézidénti jow baydén "Béyjing qishliq olimpik tenheriket musabiqisini déplomatik boyqut qilishni oylishiwatimiz" dégen

Muxbirimiz irade
2021-11-18
Share

Amérika prézidénti jow baydén amérikaning 2022-yilliq béyjing qishliq olimpik tenheriket musabiqisini xitayning kishilik hoquq xatirisi sewebidin diplomatik boyqut qilishni oylishiwatqanliqini éytqan.

U bu sözlerni 18-noyabir peyshenbe küni kanada bash minstiri justin trudo bilen ötküzgen söhbitidin kéyinki muxbirlarni kütüwélish yighinida qilghan.

U muxbirlarning so'aligha jawab bergende, kéler yili 2-aydiki béyjing qishliq olimpik musabiqisini boyqut qilish pikrini "Biz oylishiwatqan bir ish" dégen.

Adette olimpik musabiqisining en'enisi boyiche amérika we bashqa döletler musabiqige yuqiri derijilik emeldarlar ömiki ewetidighan bolup, bu yil 7-ayda tokyoda ötküzülgen olimpik musabiqisige birinchi xanim jil baydén amérika tenheriketchilirige yétekchilik qilip barghan idi.

Eger béyjing qishliq olimpiki boyqut qilin'ghan teqdirde, amérika uninggha héchqandaq déplomatini ewetmeydiken, emma tenheriketchiler bérip musabiqige qatnishiwéridiken.

"Washin'gton pochtisi" géziti ikki kün aldida élan qilghan xewiride, xitay hökümitining Uyghurlargha qaritiwatqan irqiy qirghinchiliqi sewebidin béyjing qishliq olimpik musabiqisini boyqut qilish teklipining aqsaraygha resmiy yosunda yollan'ghanliqini we prézidént baydénning mushu ayning axirighiche bu heqte bir qarar chiqiridighanliqini bildürgen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet