Béyjingda korona wirusi yuqum weziyiti shekillendi

Muxbirimiz jüme
2020-06-14
Élxet
Pikir
Share
Print

Béyjingda korona wirusi yuqum weziyiti shekillinip, bu hepte axiri sheherning bir qisim rayonliri taqalghan.

Xitay hökümet axbaratlirining xewer qilishiche, 14-iyun'ghiche béyjingda yéngidin bayqalghan korona wirusi yuqumdarlirining sani 51 ge yetken.

Da'iriler shenbe küni yuqumdarlar deslepte bayqalghanliqi mölcherlen'gen shinfadi yéza igilik mehsulatliri top tarqitish bazirini taqighan.

En'gliyedin chiqidighan "Hamiy" gézitining xewirige qarighanda, hepte axiri yene top tarqitish bazirigha yéqin jaydiki bir olturaq rayonimu karantin astigha élin'ghan.

Uningdin bashqa xitayning bashqa jaylirida yéngidin bayqalghan yuqumdarlar sani 19 gha yetken.

Shuning bilen bu yuqum weziyiti mezkur wirusining xitayda ikkinchi qétim partlashi mumkin, dégendek endishilerge seweb bolghan. 

Melum bolushiche, béyjing shehirining merkizidiki bir yémek-ichmek we köktat bazirimu taqalghan.

Korona wirusi wuxende bayqalghandin kéyin hazirgha kelgüche 7. 8 Milyon ademni yuqumlandurghan, 430 ming ademning jénigha zamin bolghan idi. 

Halbuki xitay mezkur wirusining özidin tarqalghanliqini ten almighandin bashqa yene xelq'ara mutexessislerning tekshürüsh telipini ret qilip kelgen. 

Xitay bu qétim béyjingda bayqalghan yéngi yuqumdarlarning yuqumlinish menbesigimu so'al qoyghan.

"Yershari waqit géziti" yekshenbe kündiki bir parche xewiride mutexessislerning éytqanliridin neqil keltürüp bu nöwet béyjingda peyda bolghan yuqum weziyitini chet'eldin xitaygha yuqumlinip kelgenler peyda qilghan bolushi mumkinlikni ilgiri sürgen.

Nöwette béyjingda partlighan korona wirusi yuqum weziyitining heqiqiy ehwali hazirche namelum.

Toluq bet