Béyjingdiki wirus yuqumi yéngiwashtin zoraymaqta

Muxbirimiz eziz
2020-06-16
Share

Xitay hökümitining tajsiman wirusi heqqidiki melumatliri xelq'araning zor gumanini qozghawatqanda wirus yuqumining xitay teweside yéngiwashtin zoriyiwatqanliqi köp tereplime uchurlardin melum bolushqa bashlidi.

"Muhapizetchi" gézitining 16-iyundiki xewiride éytilishiche, béyjing da'iriliri hazir sheher teweside yuqum ehwalining pewqul'adde éghirliqini tekitlewatqan bolup, herqaysi jaylarda tosuqlar we tekshürüsh nuqtiliri yéngiwashtin ornitilishqa bashlighan. Yuqum ehwali éghir bolghanlarning sheherdin chiqishi men'i qilinip öyde olturushigha buyruq bérilgen.

Béyjing sheherlik hökümetning bayanatchisi shü xéjyen muxbirlarni kütüwélish yighinda bu heqte söz qilip: "Paytextning yuqum ehwali bek éghir. Biz hazir wirusning aldini élish üchün qattiq tedbirlerni yolgha qoyushqa mejbur boluwatimiz," dégen.

CNN Agéntliqining bu heqtiki xewiride éytilishiche, béyjing shehiride hazir yéngi yuqumdarlarning sani az dégendimu yüzdin éship ketken. Buning bilen nurghunlighan ahale olturaq rayoni qamal qilinip, ottuz nechche ming réstoran dézinféksiye qilin'ghan. Bolupmu béyjing shehirining féngtey rayonidiki méwe-chéwe we köktat bazarliri sheher istémalining asasiy menbesi bolup, bu rayonning mushu shenbe künidin bashlap qamalgha élinishi alliqachan zor wehime peyda qilishqa bashlighan. Buninggha ulapla shinfadi we shichéng rayonliridiki yémeklik bazarlirimu taqalghan. Bu rayondiki ahaliler rayoni birdek qamalgha élin'ghan.

Xewerde éytilishiche, wirus yuqumi yene lyawning we xubéy ölkiliridimu körülgen bolup, sichüen ölkisidimu bayqalghan. Emma hazirche béyjing shehiri toluq qamal qilinmighan bolsimu, shangxey qatarliq sheherlerde wirus yuqumi bar jaydin kelgenlerni 14 kün karantin qilish bashlan'ghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet