Бенгалда хитай һөкүмитиниң уйғурларға йүргүзүватқан зулум сиясәтлиригә қарши намайиш елип берилған

Мухбиримиз ирадә
2018-09-11
Елхәт
Пикир
Share
Принт

Бенгалдики «йеңи милләт күндилик хәвәрлири» қатарлиқ агентлиқларниң хәвәр қилишичә, 7-сентәбир җүмә күни бенгалдики миңлиған мусулман аһалиси хитай һөкүмитиниң уйғурларға қаратқан зулум сиясәтлири вә райондики «йепиқ тәрбийә лагерлири»ға қарши зор көләмлик наразилиқ намайиши елип барған.

Бенгалниң дака шәһиридә елип берилған намайиш җүмә намизидин кейин башланған болуп, қоллирида уйғурлар учраватқан зулумға аит рәсимләрни көтүргән намайишчи амма бирликтә «хитай һөкүмити уйғурларға зиянкәшлик қилишни тохтат», «уйғур мусулманлирини өлтүрүшни тохтат» дегәндәк шоарларни товлиған. Мәзкур намайишни бенгалдики «исламий андолон» дәп атилидиған бир тәшкилат уюштурған икән.

Хитай һөкүмитиниң уйғур елидә тәхминән бир милйон уйғур вә башқа мусулман хәлқләрни «йепиқ тәрбийә лагерлири»ға қамаш, йәнә икки милйондәк уйғурни күндилик тәрбийәгә орунлаштуруп, уларни өз етиқади вә кимликидин ваз кечишкә қиставатқанлиқи б д т ирқий айримичилиққа қарши туруш комитети тәрипидин рәсмий елан қилинған болсиму, буниңға сәуди әрәбистан, мисир вә түркийә қатарлиқ мусулман дөләтлириниң һечқандақ бир ипадә билдүрмәслики күчлүк диққәт қозғиған иди.

Бу һәқтә йеқинда «хаффиңтон почтиси гезити», «ташқи сиясәт» журнили қатарлиқларда елан қилинған мақалиләрдиму бу мәсилә оттуриға қоюлуп, «өзини диний әқидиниң баянатчисидәк қилип көрситип кәлгән сиясәтчиләр вә диний рәһбәрләр хитайниң иқтисадий вә сиясий күчи алдида сүкүт қилди. . . Нурғун мусулман дөләтлири хитай билән мунасивитини қоюқлаштурупла қалмай, бәзилири һәтта хитайниң зиянкәшликлирини қоллайдиған дәриҗигә йәтти» дәп йезилған.

Чәтәлләрдики уйғур көзәткүчиләрниң ейтишичә, ислам дунясидики чоң дөләтләр сүкүт қилишни давамлаштуруши уларни әпсусландуруш билән биргә, бенгалдики мусулман хәлқләрниң тунҗи болуп оттуриға чиқиши уларни һәм хушал қилған һәм һәйран қалдурған.

Пикирләр (0)
Share
Толуқ бәт