Bén'galda xitay hökümitining Uyghurlargha yürgüzüwatqan zulum siyasetlirige qarshi namayish élip bérilghan

Muxbirimiz irade
2018-09-11
Élxet
Pikir
Share
Print

Bén'galdiki "Yéngi millet kündilik xewerliri" qatarliq agéntliqlarning xewer qilishiche, 7-séntebir jüme küni bén'galdiki minglighan musulman ahalisi xitay hökümitining Uyghurlargha qaratqan zulum siyasetliri we rayondiki "Yépiq terbiye lagérliri"gha qarshi zor kölemlik naraziliq namayishi élip barghan.

Bén'galning daka shehiride élip bérilghan namayish jüme namizidin kéyin bashlan'ghan bolup, qollirida Uyghurlar uchrawatqan zulumgha a'it resimlerni kötürgen namayishchi amma birlikte "Xitay hökümiti Uyghurlargha ziyankeshlik qilishni toxtat", "Uyghur musulmanlirini öltürüshni toxtat" dégendek sho'arlarni towlighan. Mezkur namayishni bén'galdiki "Islamiy andolon" dep atilidighan bir teshkilat uyushturghan iken.

Xitay hökümitining Uyghur élide texminen bir milyon Uyghur we bashqa musulman xelqlerni "Yépiq terbiye lagérliri"gha qamash, yene ikki milyondek Uyghurni kündilik terbiyege orunlashturup, ularni öz étiqadi we kimlikidin waz kéchishke qistawatqanliqi b d t irqiy ayrimichiliqqa qarshi turush komitéti teripidin resmiy élan qilin'ghan bolsimu, buninggha se'udi erebistan, misir we türkiye qatarliq musulman döletlirining héchqandaq bir ipade bildürmesliki küchlük diqqet qozghighan idi.

Bu heqte yéqinda "Xaffington pochtisi géziti", "Tashqi siyaset" zhurnili qatarliqlarda élan qilin'ghan maqalilerdimu bu mesile otturigha qoyulup, "Özini diniy eqidining bayanatchisidek qilip körsitip kelgen siyasetchiler we diniy rehberler xitayning iqtisadiy we siyasiy küchi aldida süküt qildi. . . Nurghun musulman döletliri xitay bilen munasiwitini qoyuqlashturupla qalmay, beziliri hetta xitayning ziyankeshliklirini qollaydighan derijige yetti" dep yézilghan.

Chet'ellerdiki Uyghur közetküchilerning éytishiche, islam dunyasidiki chong döletler süküt qilishni dawamlashturushi ularni epsuslandurush bilen birge, bén'galdiki musulman xelqlerning tunji bolup otturigha chiqishi ularni hem xushal qilghan hem heyran qaldurghan.

Toluq bet